भांगरभूंय | प्रतिनिधी
काणकोण, प्रतिनिधी: अपघातांचें प्रमाण दिसान दीस वाडतूच आसा. हें सत्र थारपाचें नांवूच घेना. दरेक दिसा अपघात जाता वा अपघातांत कोणाक ना कोणाक मरण येता. आयज काणकोणां एक भिरांकूळ अपघात जालो. माशें- दापट ह्या वाठारांत एक मोटार आनी कदंब बसी मदीं अपघात जावन एकल्याक मरण आयलें. गाडी चलोवपी राजेश वेर्णेंकार (५२, कारवार) अशें मरण आयिल्ल्याचें नांव जावन आसा. हेर पांच जाणां गंभीर जखमी जाल्यांत. ह्या अपघातांत जखमी जाल्ल्यां मदीं अंजली वेर्णेंकार (४९), रामदास वेर्णेंकार (२९), करिश्मा वेर्णेंकार (५५), अनुषा वेर्णेंकार (२१), ट्वींकल कोलवेंकार (१८), रुबिना फकीर (१९) हांचो आसपाव आसा. रुबिना हें कदंब बसीचें प्रवासी. ताका चड दुखापत जावंक नाशिल्ल्यान उपचार करून ताका घरा धाडलें.
चड म्हायती प्रमाण, सोमार, ८ एप्रिलाक सकाळच्या सुमार ८ वरांचेर हो अपघात जालो. जखमी पांच जाणांक काणकोणच्या भौशीक हॉस्पिटलांत उपचार करून फुडल्या उपचारा खातीर मडगांवच्या जिल्हो हॉस्पिटलांत धाडल्यांत. मूळ गदक, कर्नाटकांतलें हें कुटूंब कारवार रावता. हें कुटूंब गाडी घेवन देवदर्शना खातीर गोंयांत आयिल्ल्याचो अदमास आसा. गाडी चालकाचें गाडये वयल्यान नियंत्रण गेल्ल्यान हो अपघात घडलो. पुलीस घडणुके सुवातेर पावल्यात. फुडलो तपास करप चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
