भांगरभूंय | प्रतिनिधी
भारत आनी ऑस्ट्रेलिया ह्या पंगडां मदीं आयज हांगाच्या बरसापारा क्रिकेट स्टेडियमाचेर माळेंतली तिसरी टी-20 मॅच जातली. पांच मॅचींचे माळेंत भारत 2-0 असो मुखार आसा. आयची मॅच जिखून माळेंत निर्णायक आघाडी घेवपाचो भारताचो यत्न आसतलो.
संवसारीक वन डे क्रिकेटीचे फायनली उपरांत श्रेयस अय्यराक विसव दिल्लो. पूण रायपूर आनी बंगळुरूंत जावपी निमाण्या दोन मॅचीं खातीर तो पंगडांत पुनरागमन करतलो. तशेंच ऋतुराज गायकवाडाचे सुवातेर उप मुखेलपद सांबाळटलो. हाचो अर्थ ताका निमाण्या दोन मॅचीं खातीर पंगडांत सुवात मेळटली आनी ताचे खातीर चड करून तिलक वर्माक पंगडांतल्यान भायर बसचें पडुये. हो बदल फॉर्मा बदल संयोजनाक लागून जातलो.
मजगतीं, सुरवातीच्या दोन मॅचींनी युवा बॅट्समनांनी जबरदस्त प्रदर्शन केलां, हो फॉर्म आयचे मॅचींत लेगीत कायम राखपाचो तांचो यत्न आसतलो. बरसपाराची खेळपट्टी परंपरीक रितीन बॅट्समनां खातीर अनुकूल आसता. ताका लागून आयचे मॅचींत लेगीत धांवड्यांचो पावस पडपाक शकता. भारताच्या बॅट्समनांनी सुरवातीच्या दोन मॅचींनी 36 चवके आनी 24 सके मारल्यात.
स्टिव स्मिथ, ग्लॅन मॅक्सवॅल, मार्कस स्टोयनीस आनी अॅडम झम्पा सारके ऑस्ट्रेलियेचे सिनीयर खेळगडे फाटल्या णव सप्तकां परस चड काळ भारतांत आसात. हे सगले खेळगडे थकिल्ल्याचे जाणावता. फुडले माळे पयलीं तांकां विसवाची गरज आसा. हे चारूय खेळगडे फुडल्या म्हयन्यांत बिग बॅशांत खेळटना दिसतले.
भारताच्या सुरवातीच्या बॅट्समनांनी फाटल्या दोन मॅचींनी बरें प्रदर्शन केलां. यशस्वी जयस्वाल, ऋतुराज गायकवाड आनी मुखेली सुर्यकुमार यादव हे अर्द शेंकडे मारपाक येसस्वी थारल्यात. संवसारीक वन डे क्रिकेट सर्ती वेळार सुमार साडे पांच सप्तक बॅंचार बसून रावन लेगीत इशान किशन लयेंत आसा. ताणें सेगीत दोन अर्द शेंकडे मारल्यात. रिकू सिंगान दोनूय मॅचींनी सकयले सुवातेर जबरदस्त बॅटींग केल्या. ह्या प्रकारांत फिनिशराची भुमिका बरे तरेन सांबाळ्ळ्या. फुडल्या वर्सा जावपी संवसारीक टी-20 सर्ती खातीर पंगडांत सुवात मेळोवपाचो ताचो यत्न आसतलो.
भारता वतीन फाटल्यो सेगीत 12 टी-20 मॅची खेळपी वर्मा पयल्या दोन मॅचींनी फकत 12 बॉल खेळ्ळा. वर्मा पयले मॅचींत 209 धांवड्यांचो फाटलाव करतना पांचवे सुवातेर बॅटींग करतना दोन चवक्यांचे मजतीन 10 बॉलांनी 12 धांवड्यो केल्ल्यो. तिरुवनंथपुरमांत जाल्ले दुसरे मॅचींत रिंकूक वयले सुवातेर बॅटिंगेक धाडिल्लो आनी वर्माक फकत दोनूच बॉल खेळपाक मेळिल्ले.
भारताच्या बॉलरांनी पयले मॅचींत 208 धांवड्यो दिल्या उपरांत दुसरे मॅचींत उत्कृश्ट प्रदर्शन केल्लें. पयल्या दोन मॅचींनी निर्धाव बॉलांचे संख्येंत चड फरक नाशिल्लो. पूण, दुसरे मॅचींत दंव पडून लेगीत भारताचे बॉलर चवक्यांची संख्या उणी करपाक येसस्वी थारिल्ले. पयले मॅचींत भारता आड 24 चवके मारिल्ले, जाल्यार दुसरे मॅचींत ही संख्या अर्दी जाल्ली.
जोश इंग्लीश आनी स्टिव स्मिथ हांणी पयले मॅचींत प्रसिद्ध कृष्णाची बॉलींग फोडून काडिल्ली. पूण, दुसरे मॅचींत ताणें तीन विकेटी घेवन येसस्वी रितीन पुनरागमन केल्लें. अर्शदीप सिंगान लेगीत डॅथ ओव्हरींनी बरें प्रदर्शन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
