मालीम- बेतीं खून; दोगांक अटक

भांगरभूंय | प्रतिनिधी

मयत तरणाट्याची वळख पटोवपाचो यत्न

म्हापशें: मालीम, बेतीं- बिठ्ठोणां मांडवी पुला सकयल पोरण्या नुस्तें कापपाचें शेडींत 30 वर्सा पिरायेच्या अनवळख्या तरणाट्याचो फातरान खून केलो. ह्या प्रकरणांत पर्वरी पुलिसांनी मालीम जेटी हांगा राबित्याक आशिल्ले दुबावीत आरोपी मंधार प्रदान (18, रा. झारखंड) आनी भौला उर्फ भोला उर्फ नारायण सिंग (23, रा. झारखंड) ह्या दोगांक अटक करून ह्या प्रकरणाचो तपास लायलो.

मजगतीं, अजून मेरेन मरण आयिल्ल्याची वळख पटिल्ली ना. तोवूय झारखंडांतलोच आशिल्ल्याची म्हायती मेळ्ळ्या आनी पुलीस ताची वळख पटोवपाचो यत्न करतात.

शेनवारा 9 वेर सांजवेळा 6 वरांच्या सुमाराक बिठ्ठोणचे वटेन मांडवी पुला सकयल मालीम बेतीं हांगा पोरण्या नुस्तें कापपाचे शेडींत एका 30 वर्सा पिराये गटांतल्या अनवळखी तरणाट्याची कूड सांपडली. मयताचो चेरो फातरान चेंचायिल्लो. तशेंच ताचे तकलेर कवचेच्यो बाटल्यो फोडिल्ल्यो.

घडणूक थळार सोऱ्याच्यो बाटल्यो, रिते प्लास्टीक ग्लास, उदकाची बाटली हें साहित्य पडिल्लें. ताका लागून सोऱ्याचे घुंवळेंत मयत आनी आरोप्यां मदीं झगडीं जावन तातूंतल्यान हो खुनाचो प्रकार घडिल्ल्याचें मुळावे चवकशेंतल्यान दिसून आयिल्लें.

पुलिसांनी चवकशी केले उपरांत वयल्य दोगां दुबावितांक आयतारा रातीं ताब्यांत घेतिल्ले. दुबावितांनी खुनाचो गुन्यांव कबूल केले उपरांत तांकां अटक केली. दोनूय दुबावितांक रितसर अटक केली. म्हापशें न्यायालयान दुबावितांक पांच दिसांची पुलीस कोठी दिल्या.

पुलीस निरिक्षक राहूल परब हांच्या मार्गदर्शना खाला उपनिरिक्षक मयूर सावंत, प्रतीक तुळसकार, आकाश चोडणकार, अरुण शिरोडकार, सहाय्यक उपनिरिक्षक उमेश पावसकार, हवालदार कख, सुनील चव्हाण, आकाश नावेलकार, विराज मळीक, वैभव कांबळी, ईश्वरराज शेट, सिध्देश परब, सर्वेश मार्टीन, प्रितेश किनळेकार, मनोहर परवार, कल्पेश गावस (पणजी दर्यादेग पुलीस), निखील भामयकार, सिध्देश नायक आनी हरूण शेख ह्या पंगडान ही कामगिरी केली.

फुडलो तपास पुलीस अधिक्षक अक्षत कौशल आनी उपअधिक्षक विश्वेश कर्पे हांच्या मार्गदर्शना खाला सुरू आसा.

दुबावीत आरोपी कृष्णा प्रधान आनी भोला सिंग हे दोगूय झारखंडांतले आसून ते मालीम जेटीर दीसवड्यार नुस्तेमारी बोटीचेर काम करताले. नुस्तेमारी सुरू जाले उपरांत दोन-तीन म्हयन्यां पयलीं ते गोंयांत आयिल्ले आनी जेटी वाठारांतूच रावताले.