भांगरभूंय | प्रतिनिधी
उत्तर प्रदेशांतल्या दुबाविताक अटक
भांगरभूंय । प्रतिनिधी
पेडणें: पेडणें पुलिसांनी मालपें रेल्वे स्टेशना लागसार धाड घालून 2.50 लाखांचो दोन किलो 410 ग्राम गांजो जप्त केलो. गांजो बाळगिल्ल्या प्रकरणांत सनबर उत्तर प्रदेशांतल्या ब्रिजेश रामदेव (21) हाका पेडणें पुलिसांनी अटक केली.
एक मनीस गांजो विकपा खातीर मालप्यां येतलो, अशी म्हायती पेडणें पुलिसांक गुप्तहेरा कडल्यान मेळिल्ली. ते प्रमाण पेडणेंचे पुलीस निरिक्षक उत्तम रावत हांणी एक पंगड घडोवन तातूंत स्वता वांटो घेवन मालपें रेल्वे स्टेशनाच्या वाठारांत सांपळो रचलो. मालपे रेल्वे स्टेशना कडेन ब्रिजेश रामदेव आयलो तेन्ना दुबावा वयल्यान ताका ताब्यांत घेवन ताची झडटी घेतली. त्या वेळार ताचे कडेन दोन किलो 410 ग्राम गांजो सांपडलो. बाजारांत ताचें मोल 2.50 लाख जाता. पुलिसांनी दुबावीत ब्रिजेश रामदेवा आड घुंवळे वखदां विरोधी कायद्या खाला गुन्यांव नोंद करून अटक केली. पेडणें पुलीस स्टेशनाचे निरिक्षक उत्तर रावत हांच्या मार्गदर्शना खाला उपनिरिक्षक हरीश वायंदणकार, उपनिरिक्षक विवेक हळर्णकार, पुलीस कॉन्स्टेबल प्रज्योत मयेंकार, पुलीस कॉन्स्टेबल कृष्णा वीर, पुलीस न्स्टेबल प्रेमनाथ सावळ देसाय तशेंच सागर खोर्जुवेंकार हांणी कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.