भांगरभूंय | प्रतिनिधी
सगले तरेचे येरादारी खातीर रस्तो बंद; नितीन गडकरी हांणी भेट दिवपाची मागणी
पेडणें: पेडणें म्हालांतल्या मालपें पोरस्कडें राष्ट्रीय म्हामार्ग 66 चेर राखणे वण्टी सयत पालसणं कोसळपाची घडणूक घडिल्ली. उपरांत परतून एकदां दुसरे वटेनचें पालसण व्हड प्रमाणांत कोसळिल्ल्यान हो रस्तो सगले तरेचे येरादारी खातीर बंद केला.
पोरस्कडे मालप्यां राष्ट्रीय म्हामार्ग 66 चो बायपास रसतो फाटल्या दोन वर्सां सावन सुरू आशिल्लो. पोरूं वर्सा ह्याच रस्त्याचे कुशीक व्हड पालसण आशिल्ले तें पालसण व्हड प्रमाणांत कोसळिल्लें. त्या वेळार हो रस्तो सगले तरेचे येरादारी खातीर बंद आशिल्ल्यान कसलीच वायट घडणडूक घडूंक नाशिल्ली. पूण अंदूं ह्या रस्त्याचें उक्तावणूय जालें. उपरांत रोखडीच रस्त्याचे कुशीक जी राखणे वणत बांदिल्ली ती वणत कोसळ्ळी. उपरांत परतून एकदां फाटल्या चार दिसां पयलीं पालसण कोसळिल्लें. आनी काल फांतांडेर दुसरे वटेनचें व्हड प्रमाणांत आशिल्लें पालसण कोसळ्ळें.
रस्तो फाटल्या दोन दिसां पयलीं बंद दवरिल्ल्यान कसलीच वायट घडणूक घडली ना. नाजाल्यार व्हड दुर्घटना घडपाची शक्यताय आशिल्ली.
सद्या हो बायपास रस्तो पालसण कोसळिल्ल्यान पुरायपणान सगले तरेचे येरादारी खातीर बंद दवरला आनी जो पयलींचो राष्ट्रीय म्हामार्ग 17 आशिल्लो तो चालू दवरला.
राष्ट्रीय म्हामार्गाचें काम एमव्हीआर कंत्राटदारा कडल्यान करतात. ह्या रस्त्याचें बांदकाम करीत आसतना दोंगर वेवस्थीत कापी नासतना खूबशे कडेन सरळ रेशेंत कापिल्ल्यान घात निर्माण जाला.
राष्ट्रीय म्हामार्गार जे पद्दतीन पालसणां कोसळपाचे प्रकार सेगती घडत आसात, ते फाटभुंयेर विरोधकांनी निरशेवणी उक्तावण सरकाराचेर टिका केली. तेच फाटभुंयेर ज्या दिसा पालसण कोसळ्ळें, त्याच वेळार थळावे आमदार प्रवीण आर्लेकार हांणी घडणूक थळाक भेट दिवन अधिकाऱ्यांक सुचोवण्यो करून रस्तो दुसरे वटेन वळोवपाची विनंती केल्ली. उपरांत दुसरे दिसा विरोधी पक्ष फुडारी युरी आलेमांव, काँग्रेस प्रदेशाध्यक्ष अमीत पाटकार, हळदोणेंचे आमदार कार्लोस फेरेरा हांणी भेट दिली. ह्या वेळार एमव्हीआर हे कंत्राटदार कंपनीक काळे वळेरेंत घालपाची नेटाची मागणी केल्ली.
पोरणो रस्तो येरादारी खातीर घातक
पयलींचो जो राष्ट्रीय म्हामार्ग मालते ते न्हंयबाग मेरेन राष्ट्रीय म्हामार्ग 17 आशिल्लो तो दोनूय वटांनी चडटी आशिल्ल्यान मोटी वाहनां चलयतना अडचणी येतात. आनी जाग्याजाग्यांनी व्होल्तांय आसात. हाची दखल घेवन सरकारान ह्या वाठारांत बायपास रस्तोत केल्लो. पूण बायपास रस्त्याच्या दोनूय वटानची पालसणां कोसळिल्ल्यान नवो राष्ट्रीय म्हामार्ग बायपास रस्तो बंद केला, आनी आतां सगले तरेचे येरादारी खातीर पोरणो राष्ट्रीय म्हामार्ग 17 जो पयलींचो आशिल्लो तो चालू केला. सद्या येतना वतना दोनूय वटानची चडटी मेळत आशिल्ल्यान गाडी चालकांक बरीच सर्कस करची पडटा.
एमव्हीआर कंपनीन हो राष्ट्रीय म्हामार्ग तयार करतना आयज मेरेन खंययचेच थळावे पंचायतीक, थळाव्या आमदाराक, सरपांचाक, जिल्हो पंचायत वांगड्यांक विस्वासांत घेनासतना केंद्र सरकाराच्या अधिकाराचो वापर करून रस्त्याचें काम मनमानी पद्दतीन केलां.
नितीन गडकरी हांणी भेट दिवची
केंद्रीय मंत्री नितीन गडकरी 11 वेर मोपा लींक रस्त्याच्या उक्तावण सुवाळ्याक येवपाचे आसात. त्या वेळार तांणी धारगळ महाखाजन पोरस्कडे आनी उगवें वाठारांतल्या रस्त्याची पळोवणी करून कंत्राटदार कशे पद्दतीन रस्तो तयार करता हाची म्हायती समजून घेवची आनी कंत्राटदाराचेर योग्य पद्दतीन कारवाय करची अशी मागणी नागरिकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
