मालपें-पेडणें राश्ट्रीय म्हामार्गा वयली राखणे वणत कोसळ्ळी, जंक्शनाचेर भरलें उदक

भांगरभूंय | प्रतिनिधी

कोरगांव, प्रतिनिधी ः मालपें- पेडणें राश्ट्रीय म्हामार्ग 66 चेर आशिल्ली राखणे वणत आयज सकाळीं 10 वरांचे सुमाराक कोसळ्ळी. सुदैवान कोणाक कांय जावंक ना.
पेडणे तालुक्यांतल्या पत्रादेवी सावन म्हाखाजण धारगळें मेरेनचो राष्ट्रीय म्हामार्ग 66 बांदपाचो कंत्राट एमव्हीआर कंपनीक दिला. हे कंपनींन राष्ट्रीय म्हामार्ग रुंद आनी डांबरीकरण करता आसतना थळाव्या लोकांक विस्वासांत घेनासतना रस्त्याचें काम मनमानी पद्दतीन केलां. देशांतल्या सगळ्यांत वायट रस्त्यां मदीं हो रस्तो नोंद जाता. हे सरकाराक खबर आसून लेगीत सरकाराकय ह्या एमव्हीआर कंपनी आड कांयच करना.
मालपें राष्ट्रीय म्हामार्ग करतना बायपास रस्तो तयार केल्लो. फाटल्या वर्सा हो रस्तो तयार करतना व्हड पालसणां कोसळपाक लागून रस्तो पुरायपणान बंद आशिल्लो. देखून पयलींचो राष्ट्रीय म्हामार्ग 17 वयल्यान वाहनां येरादारी करताली. पूण हो बायपास रस्तो राष्ट्रीय म्हामार्ग 66 बांदतना तयार केला. आनी ह्या बायपास रस्त्याचे कुशीक व्हड पालसणां आसा. जी राखणे वणत आयज सकाळीं कोसळ्ळी तिचो वण्टीचो उरिल्लो भागय कोसळपाची शक्यताय आसा असो भंय नागरिकांनी उक्तायला.

पेडणे तालुक्यांतल्या धारगळें म्हाखाजण ते पात्रदेवी मेरेनच्या राष्ट्रीय म्हामार्गाचेर गटर वेवस्था, व्हड पालसणां आनी बांदिल्ली राखणे वणत हाका लागून धोको निर्माण जाल्लोच आसा तर दोन दीस पडिल्ल्या पावसाक लागून कांय सुवातींनी रस्त्यार उदक भरिल्ल्यान गाडयेकारांक ताचो बरोच त्रास जाता. पेडणेंच्या मालपे जंक्शनाचेर खूब उदक भरिल्ल्यान उदकांतल्यान गाडयेकारांक वाट काडची पडटा.
रस्त्या कुशीक आशिल्ली गटाराची वेवस्था इबाडिल्ल्यान अशें घडटा. राश्ट्रीय म्हामार्ग बांदतना गांवांनी वचपी सर्विस रस्ते म्हत्वाचे जावपाक लागल्यात. ह्या सर्विस रस्त्याचे कुशीक आशिल्ली गटार वेवस्था इबाडल्या. हे सर्विस रस्ते सारके करपाक सरकार अपेस आयलां. सध्या भौशीक बांदकाम खातें मुख्यमंत्री डॉ. प्रमोद सावंत हांचे कडेन आसा. तांणी येवन पेडणे तालुक्यांतल्या रस्त्यांची एकदां तरी पळोवणी करची अशी मागणी नागरिकांनी केल्या.