भांगरभूंय | प्रतिनिधी
म्हापशें, प्रतिनिधी ः मार्ना – शिवोलेंतल्या चावडीवाड्या वयल्या एका बंगल्यांत चोरांनी फाटल्या दारांतल्यान भितर सरून 4.50 लाखांच्यो भांगराच्यो वस्ती फारायल्यो.
ही घडणूक मंगळारा रातीं 1 ते फांतोडेर 5.30 वरां मजगतीं घडली आसुये. अनसुया शर्मा (मुळ कोलकाता) हांणी हणजुण पुलिशेंत कागाळ केल्या. कागाळदार शर्मा हें एक वेवसायीक कुटुंब फाटलीं दोन वर्सां ह्या बंगल्यात रावता.
घडणुकेच्या वेळार शर्मा कुटुंब न्हिदिल्ले. चोरांनी बंगल्याचे फाटलें दार उगडून भितर प्रवेश केलो. उपरांत घरांतली आलमारी फोडून 1 ब्रेसलेट, भांगराचें कडे, काकणां, हार, हिऱ्याचीं कर्णफुलां, भांगराची चेन आशिल्लो हार अश्यो सुमार 4 लाख 50 हजारांच्यो भांगराच्यो वस्ती फारायल्यो.
कागाळदार कुटुंब सकाळीं जागे जाले उपरांत चोरयेची घडणूक तांच्या लक्षांत आयली. उपरांत तांणी पुलिसांक आपयले. पुलिसांनी पंचनामो करून चोरांचेर गुन्यांव नोंद केलो. पुलीस उपनिरिक्षक साईश किनळेकार फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
