भांगरभूंय | प्रतिनिधी
इगर्जांनी सव्या शेंकड्या पसून मारियेच्या जल्माचो सभारंब केला आनी तो करचे पासत सप्टेंबर म्हयनो वेंचून काडला. कारण अस्तंती इगर्जो सेवाधर्मीक वर्स सप्टेंबर पसून सुरू करतात. सप्टेंबरची 8 तारीख, निश्पापी गर्भ पाळिल्ल्या आंकवार मारयेची परब (डिसेंबर 8 तारीख) निश्चीत करपाक मदत करता.
पवित्र शास्त्र मारियेच्या जल्माची कांयच म्हायती दिना. तरी लेगीत, जेम्स हाचें अपोक्रिफल प्रोटोइव्हेंजेलियम हें ताचें अंतर भरून काडटा. ह्या ताच्या अहवालाचें कांयच इतिहासीक म्हत्व ना, पूण तो क्रिस्तांव धर्मीकतेचो विकास प्रतिबिंबीत करता. ह्या अहवालांतल्या म्हायती प्रमाण, अॅना आनी जॉकीं नापीक (infertile) आसतात पूण भुरग्या खातीर तीं खूब प्रार्थना करतात. उपरांत तांकां एका भुरग्याचें वचन प्राप्त जाता, जें देवाच्या तारणाची योजना मुखार व्हरपाचें आसता. अशी कथा, अनेक बायबल संबंदीत प्रतिरुपां प्रमाण, सुरवाती पसुनूच मारियेच्या जिवितांत देवाच्या विशेश हाजेरीचेर भर दिता.
मारियेचो जल्म जाले उपरांत, जेम्साच्या प्रोटोइव्हेंजेलियमा प्रमाण, अॅनान ल्हान बाळकाचे कुडींत “अभयारण्य” तयार केलें आनी तिच्या विशेश पवित्रताये विशीं विचार करून “सामान्य वा अशुद्ध” अशी कसलीच वस्त तिचे भोंवतणीं उरूंक दिली ना. ती एक वर्साची आसतना तिच्या बापाय, जॉकीं हाणें “मोठें जेवण” दिलें आनी याज्ञीक, शास्त्री, व्हडील आनी सगल्या इस्राएल लोकांक ह्या जेवणाक आमंत्रीत केले, अशें त्याच लेखांत बरयिल्लें आसा.
ह्या अहवालांत मुखार अशें बरयलां की जॉकींन आपले धुवेक याज्ञिकां कडेन व्हेली आनी तांणी तिका आशिर्वाद दिवन म्हणलें, “आमच्या पर्वजांच्या देवा, ह्या भुरग्याचेर तुजो आशिर्वाद घाल आनी पिळग्यान पिळगी तगपी सासणीक नांव तिका दी.” मुख्य याज्ञिकानूय तिचेर आशिर्वाद घालून “देवा, सर्वश्रेश्ट राया, ह्या बाळकाचेर तुजी दिश्ट घाल आनी ताका अंततकाळ तिगता तसलो आशिर्वाद दी,” अशें म्हणलें.
प्रोटोइव्हॅन्जेलियम फुडें वर्णन करता की मारियेच्या पालकांनी, देव मंदिराच्या याज्ञिकां वांगडा, मारियेक आयुश्यभर पवित्र आंकवारी म्हणून देवाक अर्पण करपाचो निर्णय घेतलो आनी थवय जोसेफा लागीं तिचें पवित्र लग्न केलें. सांत ऑगस्टीनानान पवित्र आंकवार मारियेच्या जल्माचें वर्णन वैश्वीक आनी इतिहासीक म्हत्वाची घटना आनी जेजू क्रिस्ताच्या जल्माची एक योग्य प्रस्तावना
म्हूण मानल्या. देखून सप्टेंबराचे 8 तारखेक दर वर्सा आंकवार मारियेचो जल्माचो दीस मनयतात.
सियालिनी फेर्नांडीस
9923021022
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
