भांगरभूंय | प्रतिनिधी
शंबर दोशी सुटल्यार उपकारता, पूण निरपराध व्यक्तीचेर अन्याय जावपाक फावना. लोकशायेचें हें एक म्हत्वाचें तत्व. देखून गुन्यांवाचो खर तपास करूंक जाय, पूण कायद्याचे चवकटींत रावन आनी मानवी हक्कांचो मान राखूनच. मात, दक्षीण गोंयांतल्या मायणा- कुडटरी पुलीस स्टेशनाचेर जें जालें ते मनीसपणाक खत लावपी. कसल्या तरी वादाक लागून पुलिशेंत आयिल्ल्या पांच तरणाट्यांक पुलिसांनी रेस्ट रुमांत व्हरून नागडे केले, तांचे गुप्त भाग पिरगळ्ळे, कुटुंबां विशीं बुरशें उलोवन गाळी संवल्यो. करीयर बरबाद करपाची, बंदखणींत घालपाची धमकी दिली, पयशेय मागले…. रातीं 10 ते मध्यानरातीं 3 मेरेन मारपेट केली. सकाळीं 9 वरांचेर तांकां सोडले. तातूंत एक नेण्टो भुरगोय आशिल्लो. अशे आरोप पिडेस्तांनी केल्यात. ते खरे काय फट ताचो तपास चल्ला. पूण त्या तरणाट्यांच्या आंगार माराचे वळ आसात. तांणी व्हिडियो वरवीं सविस्तर घडणूक सांगल्या. व्हिडियो व्हायरल जातकच सरकारान बेगोबेग पावलां उखलून पांच पुलिसांक निलंबीत केले. हे घडणुकेक स दीस जाल्यात. व्हिडियो येवंक नाशिल्लो जाल्यार कोणाक कांय कळचेंय नाशिल्लें. तांच्या वकिलाचोय व्हिडियो आसा. ताणें दावो केला की ‘राज्यभरांत असल्यो कितल्योश्योच घडणुको घडल्यात. मात लोक भियेवन तोंड उक्ते करीनात!’ 1980, 1990 च्या दशकांत पसून पुलीस अशें करतात, तशें करतात अश्यो काणयो पातळटाल्यो. मात आतां सोशल मिडियाक लागून ताचे पुरावे मेळपाक लागल्यात.
गुन्यांवकारांचे हात- पांय मोडपाक जाय. ताका फारान मारपाक जाय. बरेंच जालें, ताका बडयलो तो…. अश्यो साबार प्रतिक्रिया सोशल मिडियाचेर येतात. तातूंत तो गुन्यांवकार विशिश्ट समाजाचो आसल्यार मागीर सगलेच न्यायाधीश जातात. समाजांतूय ही मानसिकताय आतां रुजपाक लागल्या. ‘कायदो कांयच करीना, तेन्ना तो हातांत घेवंक आपूणच कृती करपाक जाय’, अशें मानपी एक व्हडलो घटक समाजांत किल्लला. पुलीस हे जनतेचे रक्षक, ते भक्षक न्हय. संविधाना प्रमाण, कोणाकूच बडोवपाक मेळना, थर्ड डिग्रीचो वापर करपाक मेळना. कायद्यान तसो अधिकार ना. सगल्यांक मानाची वागणूक मेळप हो तांचो हक्क. कलम 20 (3) प्रमाण कोणाकूच स्वता आड साक्ष दिवपाक फोर्सार करपाक मेळना. कलम 21 वरवीं दरेकल्याक वैयक्तीक स्वातंत्र्याचो अधिकार मेळ्ळा. ताका लागून दुबावीत, आरोपी आसलो तरी ताचेर अत्याचार करपाक मेळनात. अटक केल्ले व्यक्तीचेर शारीरिक वा मानसीक अत्याचार करप बेकायदेशीर. एखाद्याक गुन्यांवाच्या आरोपा खाला धरलो तरी ताचो दोश कोर्टांत सिद्ध जाय मेरेन ताका गुन्यांवकारुय मानपाक मेळना.
जायते फावट चवकशे खातीर आपयिल्ले व्यक्तींक वराचीं वरां बसोवन दवरतात. ताका अटकेचें कारण सांगपाक जाय, घरच्यांक कळोवपाक जाय, वकिलाक मेळपाची संद दिवंक जाय. वैजकी तपासणेचोय ताका अधिकार आसा. पुलिसां मुखार दिल्ली कबुली न्यायालयांत पुरावो धरिनात. कायदो सगल्यां खातीर समान आसलो तरी, चवकशे खातीर आपयला ताची समाजांत पत कितें, तो खंयच्या पदाचेर आसा, हाची जाणीव पुलिसांनी दवरूंक नाका? राजकी व्यक्तींक सहसा कोण आपयनात, पूण हेर व्यक्तींक आपयतात, तेन्ना विचार करून उलोवंक जाय. सगल्यांक एकेच तागडेंत जोखप चुकीचें. पुलीस म्हणल्यार दहशत निर्माण करपी यंत्रणा न्हय, हाची स्वता पुलिसांक जाणीव आसची. कायदो चालीक लावपीय कायद्याचे मर्यादेंत रावतात, तेन्नाच कायद्याचें राज्य घटमूट जाता. गुन्यांव रोखडोच कळचो, उणें मनीसबळ वा पोरण्यो तपास पद्दती हाका लागून पुलिसां कडल्यान मारपेट जाता. पूण कायदो ताचें समर्थन करीना.
गोंयांत गुन्यांव वाडल्यात. ताचोय परिणाम पुलिसांचेर जावं येता. मात तें कितेंय आसलें तरी मायणाच्या पुलिसांचे वागणुकीचें आनी मारपेटाचें समर्थन जावंक शकना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
