भांगरभूंय | प्रतिनिधी
मडगांव, प्रतिनिधी: कुंकळ्ळी पांझरकोणी वाठारांत रावपी आनी मूळ पश्चीम बंगालांतल्या कुटुंबांतलीं बेपत्ता आशिल्ली तिगां भावंडां कळंगुटे वाठारांत सांपडलीं. पुलिसांनी मोबायल लोकेशना वयल्यान ह्या भुरग्यांचो सोद घेतलो. सध्या ह्या भुरग्यांचो ताबो तांच्या मामा कडेन दिला.
कुंकळ्ळच्या वाठारांत कामगार म्हणून कार्यरत आशिल्ल्या मूळ पश्चीम बंगालच्या तीन सख्ख्या भावंडांचो सोद पुराय जाला. भावाक शाळेंत सोडपाचें सांगून घरांतल्यान भायर पडिल्लीं १६ पिरायेचें चली, १० पिरायेचो चलो आनी ११ पिरायेचें चली अशीं तीग भावंडां शेनवारा बेपत्ता जाल्ल्याची कागाळ भुरग्यांच्या बापायन पुलिशेंत दिल्ली.
ह्या भुरग्यांचे आवयक मरण आयले उपरांत तांच्या बापायन दुसरें लग्न केल्लें. गोंयांत रावपी ह्या कुटुंबियांच्या हेर सोयर्यां कडेन चवकशी केल्या उपरांतूय त्या भुरगीं मेळूंक नाशिल्लीं. कुंकळ्ळी पुलिसांनी व्हडले चलये कडेन आशिल्ल्या मोबायलाच्या लोकेशना वयल्यान तांचो सोद घेवपाक सुरवात केली. मात ती चली फोन बंद करून दवरिल्ल्यान आडखळी येताल्यो. रातचें उसरां ते चलयेन आपलो मोबाल चालू केलो तेन्ना तिचें लोकेशन कळंगुटे सांपडलें. पुलिसांनी रोखडेंच त्या भुरग्यांक ताब्यात घेतलीं.
त्या भुरग्यांचे तीग मामा गोंयांत रावतात. सांखळे हांगा मामाच्या घरा वचपाक भायर सरिल्लीं. तेन्ना चुकून कळंगुटे पावलीं अशें त्या भुरग्यांनी सांगलें. पुलिसांनीय त्या भुरग्यांक तांच्या मामाचे सुवादीन केलीं. कुंकळ्ळे पुलीस निरीक्षक डायगो ग्रॅसिअस हांच्या मार्गदर्शनाखाला ह्या प्रकरणाचो तपास केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
