भांगरभूंय | प्रतिनिधी
पणजी : राज्यांत व्हड पावस पडपाक लागला आनी हाका लागून जायत्या वाठारांनी झाडां, वण्टी, दुरगां पडपाच्यो घडणुको घडत आसात. लाखांनी रुपया नागरिकांक लुकसाण जालां. उजो पालोवपी दळा कडल्यान मेळ्ळिल्ले म्हायती प्रमाण, फाटल्या पंदरा दिसांत राज्यांत झाडां पडपाच्यो 317 घडणुको घडल्यात, तातूंतलीं 51 झाडां घरांचेर पडल्यात. फाटल्या पंदरा दिसांत 26.41 लाख रुपया लुकसाण जाल्ल्याचीय म्हायती मेळ्ळ्या. जाल्यार उजो पालोवपी दळान 52.15 लाख रुपया मोलाची मालमत्ता वाचयली.
उजो पालोवपी दळान दिल्ले म्हायती प्रमाण, फाटल्या पंदरा दिसांत चडशे फोन रस्त्या कुशीक झाडां पडपा विशीं आशिल्ले. फणस, आंबे, माड, रानटी झाडां रस्त्यांचेर पडल्यात. कांय झाडां घरां, कंपाउंड वा शेडींचेर पडलीं. कांय कडेन वीज लायनीचेर झाडां पडून खांबे उखलून पडिल्ले. कांय वाठारांनी झाडां पडून दोन चाकी आनी चार चाकी वाहनांचें लुकसाण जालां.
फाटल्या पंदरा दिसांत राज्यांतल्या व्हड पावसाक लागून लुकसाण जाल्ल्या करणान लोकां वांगडा वीज पुरवण आनी उजो पालोवपी दळाची धांवपळ जाल्या. वीज तारांचेर झाडां पडून खांब्यांचे लुकसाण जाला. चडशा वाठारांनी वीज पुरवण बंद आशिल्ली. उजो पालोवपी दळाक आयिल्ल्या फोनातले सगळ्यांत चड 155 कॉल रस्त्यार पडपी झाडां विशीं आशिल्ले. घरांचेर 51 झाडां, 57 वीज लायनीचेर, ट्रान्सफॉर्मर वा हेर वीज पुरवण प्रणालीचेर 57 झाडां पडल्यांत, तर दुचाकी वा चार चाकी वाहनांचेर 12 झाडां पडलीं. शेडींचेर वा हेर बांदावळीचेर 42 वेगवेगळ्या प्रकारचीं झाडां पडल्यात, अशी म्हायती मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
