भांगरभूंय | प्रतिनिधी
म्हापशें, प्रतिनिधी ः धर्मीक भावना दुखोवपाच्या प्रकरणांत न्यायालयीन बंदखणीत आशिल्ली श्रेया धारगळकार हिका आयज सकाळीं म्हापश्यांच्या जिल्लो हॉस्पिटलांत हाडले उपरांत थंय पत्रकारांक पळोवन तिणें पुलिसां आड बोवाळ घालपाचो यत्न केलो. ते उपरांत थंयच्या दोतोरांनी तिची तपासणी करून तिची मानसीक स्थिती तपासपाक बांबोळीच्या मानसीक हॉस्पिटलांत धाडली.
फातर्पेंच्या श्री शांतादुर्गा कुंकळ्ळीकान्न देवस्थानाची समिती आनी महाजन तशेंच शिरगांवांतल्या लयराई देवीच्या धोंडगणा विशीं श्रेया हिणें खूब आक्षेपार्ह भाशेंत सोशल मिडियाचेर पोस्ट केल्लो. ते उपरांत कुंकळ्ळें, दिवचल आनी म्हापशें वाठारांतल्यान समाजीक पांवड्यार तिचे आड खर प्रस्न निर्माण जाले. उपरांत तिका अटक केली. ह्या प्रकरणांत तिका 4 जून मेरेन न्यायालयीन बंदखण दिल्या.
मजगतीं, न्यायालयीन बंदखणीत आशिल्ली श्रेया हिणें आयज सकाळीं आपणाक दम्याचो अटॅक आयिल्ल्याची कागाळ केल्ली. देखून सकाळीं तिची तपासणे करपा खातीर तिका पुलीस संरक्षणा खाला म्हापशेंच्या जिल्हो हॉस्पिटलांत हाडली. पूण, थंय पत्रकारांक पळोवन तिणें बोवाळ सुरू केलो. ‘म्हाका पुलिसांनी अटक करूंक ना. हांव स्वता पुलीस स्टेशनांत आयली. हांवेन चूक केल्या जाल्यार 20 मिनटां लयराईच्या होमखणाच्या इंगळ्यांचेर उबी रावतली. कोलवाळें बंदखणींत मोबायल पावयतात. रातच्या वेळार थंय ड्युटीचेर पुलीस नासतात’ अशें तिणें बडबडपाक सुरवात केली. बायल पुलिसांनी तिका दोतोरा कडेन व्हेली. थंय तपासणी केले उपरांत तिका फुडले तपासणे खातीर बांबोळीच्या मानसीक हॉस्पिटलांत व्हेली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
