भांगरभूंय | प्रतिनिधी
सांखळे, प्रतिनिधी : हरवळेंच्या देवळांत महाशिवरात्रे निमतान आयोजीत अभिषेक आनी आरतीच्या मानपाना वयल्यान देवस्थान समिती आनी वयल्या हरवळेंच्या गांवकारां मदीं वाद जालो. ताका लागून कांय काळा खातीर दर्शन घेवपाक भक्तांक मेळ्ळें ना. निमाणें उपजिल्होधिकार्यांचे सुचवणे प्रमाण पुलीस फौज तैनात करून भाविकांक दर्शना खातीर सोडले. दनपरां परत वाद जाल्ल्यान उपजिल्हाधिकार्यांनी समितीचे पदाधिकारी आनी वयल्या हरवळ्यांचे गांवकारांक मंदिरांतल्यान भायर काडपाचो आदेश जारी केलो.
हरवळेंचें ‘श्रीक्षेत्र रुद्रेश्वर देवस्थान’ भंडारी समाजाच्या महाजनां कडेन आसा. देवस्थान समितीचेर भंडारी समाजाचे महाजन आसात. ह्या देवळांत हरवळें आनी कुडणेंच्या गांवकार महाजनांचोय मान आसता. ह्या मानपानाच्या मुद्या वयल्यान फाटल्या कांय वर्सां सावन देवस्थानांत वाद सुरू आसा. मात प्रशासन हस्तक्षेप करून हो वाद सोडयता. आयज महाशिवरात्रेचो उत्सव सुरू करतना सकाळीं हो वाद परत जालो. सकाळी समितीचे अध्यक्ष यशवंत माडकार पयल्या अभिषेका खातीर फुडें आयल्या उपरांत वयल्या हरवळेंच्या गांवकारांनी ताका आक्षेप घेतलो. गोंयच्यान आयिल्ले शिवभक्त अभिशेक आनी दर्शना खातीर वाट पळयत उबे आशिल्ले. हो वाद निर्माण जातांच भाविकांक दर्शन घेवपाक आडायले. हाची दखल घेवन उपजिल्होधिकारी, पुलीस उपअधीक्षक, पुलीस निरीक्षक, पुलीस उपनिरीक्षक फौज घेवन देवळांत आयले. तांणी ह्या विशयाचेर बसका घेवन ताचेर तोडगो काडपाचें सुचयलें आनी भाविकां खातीर दर्शनाचो मार्ग उक्तो केलो.
दनपरां परत वाद जालो
सकाळीं भाविकां खातीर दर्शनाचो मार्ग मेकळो करून दिले उपरांत परत दपनरां महाजनां मदीं वाद जालो. ताका लागून भाविकांकूय आडावन दवरले. हे घडणुके उपरांत उपजिल्होधिकार्यान आदेश जारी करून वाद घालपी सगळ्यांक देवळांतल्यान भायर काडून पुलिसांक देवूळ ताब्यांत घेवपाक सांगलें. उपरांत परत दर्शन घेवपा खातीरची वाट उक्ती केली.
आदल्या दिसा कितें घडलें?
महाशिवरात्रेच्या कार्यावळीं विशीं सांगपा खातीर देवस्थान समितीन पत्रकार परिशद आयोजीत केल्ली. ते पत्रकार परिशदेच्या निमाणे कडेन समितीच्या अध्यक्षांनी केल्ल्या विधानाक लागून कुडणेंच्या गांवकार रागार जाल्ले. देवस्थानांतलीं सगळीं मुखेल कामां भंडारी समाजांतले महाजन करतले. हेरांक नेमां प्रमाण मानपान दितले, अशें तांणी म्हणिल्लें. उपरांत काल (ता. ७) उपजिल्होधिकार्यांनी कुडणेंचे गावकार आनी देवस्थान समितीच्या पदाधिकार्यांची बसका घेवन तोडगो काडिल्लो. मात आयज वयल्या हरवळेंच्या ग्रामस्थ आनी देवस्थान समिती हांचे मदीं मानपाना वयल्यान वाद निर्माण जाल्ल्यान प्रशासना मुखार पेंच निर्माण जालो. आतां ताची बसका घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
