मानकुराद आंबो काडपा वेल्यान मारपेट

भांगरभूंय | प्रतिनिधी

दोन कुटुंबांतल्या 7 जाणांचेर एकामेकां आड गुन्यांव

म्हापशें: पडिल्लो मानकुराद आंबो काडपा वेल्यान दोन कुटुंबां मदीं मारपेट जावपाची घडणूक शेळपें धुळेरा श्रीकृष्ण देवळा कुशीक घडली. ह्या प्रकरणांत पुलिसांनी एका सरकारी वकिला सयत सात जाणांचेर एकामेकां आड गुन्यांव नोंद केला.

ही घडणूक सोमारा सांजवेळा 7.30 ते 8 वरांच्या सुमाराक घडली. कागाळदार साईश सुरेश चोडणकार हांच्या कागाळीच्या आदारान दुबावीत आरोपी दयानंद राजाराम चोडणकार, सुजाता दयानंद चोडणकार आनी तेजस दयानंद चोडणकार (सरकारी वकील) हांचे आड भा.दं.सं.च्या कलम 324, 326, 506(2), 279, 336 आनी 34. कलमा खाला पुलिासंनी गुन्यांव नोंद केला.

जाल्यार सुजाता दयानंद हांच्या कागाळीच्या आदारान दुबावीत आरोपी साईश सुरेश चोडणकार, चैताली साईश चोडणकार, सुजाता सुरेश चोडणकार आनी संपुर्णा सुरेश चोडणकार हांचे आड भा.दं.सं.च्या 451, 504, 324, 326, 506(2) आनी 34 कलमा खाला पुलिसांनी गुन्यांव नोंद केला.

कागाळदार दोनूय कुटुंबां मदीं मालमत्तेचो वाद आसा. ह्या मालमत्तेंत एक मानकुराद आंब्याचें झाड आसा. होच आंबो आतां वादाचे कारण थारता. झाडाक आंबे लागल्यात. पिकून पडिल्ले आंबे एकठांय करपा वेल्यान वयल्या कुटुंबां मदीं वाद आसा.

घडणुके वेळार एक आंबो झाडा वेल्यान पडलो. हो आंबो काडपा खातीर कागाळदाराची भयण संपुर्णा सुरेश चोडणकार ही गेली तेन्ना दुबावीत दयानंद, सुजाता आनी तेजस हांणी तिचेर हल्लो केलो. तिचो आवाज आयकून आवय, भाव आनी भावजय तिचे मजतीक धांवले. दुबावितांनी तांकां सुरी, दांडो आनी फोंपरानी मारपेट केली. तशेंच कुडीक घांस मारलो. उपरांत दुबावीत तेजस चोडणकार हाणे गतीन जखमीच्या आंगार गाडी घातली आनी तांकां जखमी केले अशें कागाळींत साईश चोडणकार हांणी म्हणलां.

जाल्यार सुजाता चोडणकार हांच्या कागाळी प्रमाण दुबावीत साईश, चैताली, सुजाता आनी संपुर्णा हांणी मालमत्तेच्या वादांतल्यान कागाळदाराच्या घरांत घुसखोरी केली. सुरी, दांड्यां सयत मारपेट करीत घांस मारून आंगार जखमो केल्यात. तशेंच जिवेशी मारपाची धमकी दिली.

घडणुकेची म्हायती मेळटकच पुलिसांनी घडणूक थळार धांव घेतली आनी सगल्या जखमींक म्हापशेंच्या जिल्हो हॉस्पिटलांत उपचारा खातीर दाखल केले उपरांत तांचेर उपचार करून घरा धाडल्यात. फुडलो तपास म्हापशें पुलीस करतात.