भांगरभूंय | प्रतिनिधी
पणजी : बढती आनी निवृत्तीक लागून माध्यमीक विद्यालयांनी (५वी ते १०वी मेरेन) साहाय्यक शिक्षकांचीं अदमास १०० पदां तयार जातलीं. हीं पदां दोन, तीन म्हयन्यां भितर तयार जातलीं. हाका लागून कर्मचारी भरती आयोगा वरवीं फुडल्या वर्सा पदां भरपाची प्रक्रीया सुरू जातली, अशी म्हायती शिक्षण खात्या कडल्यान मेळ्ळी.
अंदूं कांय ज्येश्ट शिक्षकांक मुख्याध्यापक पदाचेर बडटी मेळ्ळ्या. कांय जाण निवृत्त जाल्यात. हाका लागून शिक्षकांचीं पदां तयार जायत आसात. सगळ्या पदांची बेरीज करून तीं कर्मचारी भरती आयोगाक धाडटले, अशी म्हायती शिक्षण संचालक शैलेश झिंगडे हांणी दिली. आतां सगळ्या यत्तां खातीर राष्ट्रीय शिक्षण धोरणाची कार्यवाय सुरू जातली. हाका लागून कांय विशयांची भर पडल्या. विशयां प्रमाण कितले शिक्षक जाय तांची म्हायती घेवन ते प्रमाण कर्मचारी भरती आयोगाक पदांची म्हायती दितले. कंत्राटी पदाचेर भरती करपाची जाली जाल्यार पसून प्रस्ताव सरकाराक सादर करचो पडटलो. सरकारान मान्यताय दिले उपरांत कंत्राटी पद्दतीचेर भरती करप शक्य जातलें, अशें तांणी सांगलें.
सध्या मुळाव्या शाळांनी (प्रायमरी स्कूल) मराठी शिक्षकांची ३५२, जाल्यार कोंकणी शिक्षकांचीं ३८ पदां भरपाचीं आसात. हाचे खातीर दोनूय सीबीटी परीक्षा जावन निकाल जाहीर जाल्या. कर्मचारी भरती आयोगान निवडीची वळेरी जाहीर केल्या उपरांत तांकां शाळांनी पोस्टींग दिवपाचो वावर शिक्षण खातें करतलें, अशी म्हायती शिक्षण संचालकांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
