भांगरभूंय | प्रतिनिधी
फादर बोलमॅक्स परेरा अचकीत गेले. फाटल्याच 24 एप्रीलाक तांणी आपलो पन्नासावो वाडदीस मनयिल्लो. जमनी कडेन नाळ जोडिल्लो, तिचे कडेन एकरुप जाल्लो, जमनीचे जतनाये खातीर वावुरपी हो खरो ‘मातयेचो मनीस’. पर्यावरण, शेती, माती, गोंय, गोंयकार, गोंयकारपणाचेर तांचो निसुवार्थी मोग. सध्या ते चिखले धर्मगुरू आशिल्ले. धर्मीक कार्या वांगडाच तांणी सैमाक देव मानून तिची सेवा केली, अशें म्हणल्यार अतिताय थारची न्हय. तांच्या वचपान पर्यावरण चळवळीचें व्हडलें लुकसाण जालां. जांव तें मागीर म्हादय बचाव आंदोलन, धर्मीक- समाजीक एकवट वा गोंयची जमीन सांबाळपाचें आंदोलन. गोंयां खातीरच्या सगल्याच आंदोलनांक तांणी शेर्मांवांतल्यान तेंको दिलो. जाहीर सभांक हाजीर रावन रोखठोक विचार मांडले. धर्मगुरू जावनूय, सगल्या जाती- धर्माच्या तरणाट्यांक ते घरचे कशे दिसले, हें तांचें खाशेलेंपण. नीज गोंयकारांच्या रक्तांतूच आशिल्ल्या धर्मीक एकचाराची ही एक जिती- जिवी देख म्हणूं येता.
ज्या समाजान माती सांबाळ्ळी, ताणेंच आपलो फुडार सांबाळ्ळो. माती म्हणल्यार फक्त जमीन न्हय, तर अन्न, संस्कृताय, जिविताची ती बुन्याद आसता. देखून सैमाची राखण म्हणल्यार मनीसजातीची राखण. पर्यावरण तिगल्यार गोंयची वळख उरतली, हाची जाणीव फादर बोलमॅक्स हांकां आशिल्ली. चर्चींत प्रार्थने वेळार जायते फावटीं ते ह्या विशयांचेर स्पश्ट उलयताले. ताचे व्हिडियो आसात. राजकारणा वयल्या उलोवपांचेर स्पश्टीकरण दितना ते सांगताले, ‘आपणे केन्नाच अमक्या पक्षाक मतां घालात, अशें सांगूंक ना. जाणें पक्षांतर करूंक ना, जो भ्रश्टाचारी न्हय, जो लोकांचे इत्से प्रमाण काम करता, ताकाच मत दियात, अशें हांव सांगतां.’ जुलय 2023 त तांचें ‘छत्रपती शिवाजी महाराज हे एक आदर्श आनी म्हान राजा. ते देव न्हय’, अश्या आशयाचें विधान वादग्रस्त थारिल्लें. तें आयकून, वाचून भावना दुखिल्ल्यान गोंयांतल्या कांय संघटणांनी खर निशेध केल्लो. बोलमॅक्स हांचे आड गुन्यांवूय नोंद जाल्लो. उपरांत तांणी ‘आपलो महाराजांचो अपमान करपाचो हेतू नाशिल्लो, तर इतिहासांतले एके आदर्श व्यक्ती कडेन विवेकी नदरेन पळोवपाचो आशिल्लो’, अशें सांगिल्लें.
फादर बोलमॅक्स हांचो जल्म 24 एप्रील 1976 चो. गांव केपें. साळगांवां धर्मीक शिक्षण घेतकच ते 2004 त धर्मगुरू जाले. विज्ञान आनी सैमाचे आवडीक लागून तांणी कांदळींचेर वनस्पतीशास्त्राची (बाॅटनी) पदवी घेतली. पर्यावरणशास्त्रांत पदव्युत्तर शिक्षण केले उपरांत बाॅटनींत पीएचडी केली. म्हाविद्यालयांत कांय काळ प्राध्यापक म्हूणय तांणी काम केलां. शिक्षणा उपरांत ते देश, विदेशांत शिकोवपाचें काम सहज करूं शकताले. पूण तांकां सैमाची, मातयेची ओड…. आनी लोकांचीय! घडये तेच खातीर ते धर्मगुरू जाले आसतले. पर्यावरण अभ्यासक, समाजवावुरपीय म्हूणय तांचें नांव जालें. तांचे सारके पीएचडी केल्ले मनीस आंदोलनांनी सहसा दिसनात. कोविडाच्या काळांत स्थलांतरीत गांवघरा गेल्ल्यान शेतां, पोरसां, भाटां मुखार संकश्ट उबे रावलें तेन्ना फादर बोलमेक्सान चिखले एक प्रयोग केलो. तरणाट्यांक मुखार काडून पडंग शेतां लागवडी खाला हाडलीं, तींय बी सेंद्रीय सारें वापरून. पोरसांय रोयलीं. तरणाट्यांक शेतवडी कडेन ओडून स्वावलंबी करपाची उपरांत चळवळूच कशी उबी जाली. पाचवे धर्तरे कडेन, मातये कडेन एकनिश्ठ आशिलो हो मनीस.
तांचें व्यक्तीमत्व अश्टताशी. शिक्षण, पर्यावरण धर्म, कृशी, समाजीक लागणूक हांचो एक सोबीत मेळ फादर बोलमॅक्स हांचे मदीं दिसतालो. फक्त क्रिस्तांवूच न्हय, तर हेर धर्माच्या तरणाट्यांचेय ते प्रेरणास्थान आशिल्ले. नोव्हेंबर 2015 त जमीन रुपांतरां आड वावुरपी पर्यावरणवादी फादर बिस्मार्क डायस (52) हांकां मरण आयिल्लें, आतां फादर बोलमॅक्स तरणे पिरायेचेर गेले. गोंय, गोंयकारां कडेन संबंदीत चळवळींक बशिल्लो हो व्हडलो धपको. तांकां आर्गां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
