भांगरभूंय | प्रतिनिधी
टेनंट व्हेरिफिकेशन अर्ज सादर करूंक नाशिल्ल्यान कारवाय
म्हापशें, प्रतिनिधी ः माडेल- थिवीच्या लाला की बस्तींत कोलवाळ पुलिसांनी टेनंट व्हेरिफिकेशन मोहीम सुरु केली. हे वेळार टेनंट व्हेरिफिकेशन अर्ज सादर करूंक नाशिल्ल्यान 96 जाणांक अटक केल्या.
हालीं चोरांनी थिवेच्या औचिनवाडो हांगाच्या जुबेदा कादेर छपराबंद हांच्या घरांत घुसून 1.90 लाखांच्यो भांगराच्यो वस्ती फारायल्यो. इतलेंच न्हय तर थिवींत जावपी चोरयेच्या घडणुकांक आळाबंदा हाडपा खातीर ही मोहीम पुलिसांनी चालीक लायली.
टेनंट व्हेरिफिकेशन मोहीम आयतारा 23 तारखेक सकाळीं सुरु केली. पुलिसांनी बस्तींत रावपी सगल्या भाड्यांच्या घरांतल्या लोकांची तपासणी करून 97 जाणांक ताब्यांत घेतले. ह्या भाड्याच्या 96 जाणांच्या घरांच्या धनयांनी टेनंट व्हेरिफिकेशन अर्ज भरून पुलीस स्टेशनांत सादर केल्लो ना अशें दिसून आयलें. देखून ह्या सगल्यांक कलम 41 सीआरपीसी कायद्या खाला प्रतिबंधात्मक कारवाय खाला अटक केली. उपरांत संबंदीत लोकांक उपजिल्होधिकाऱ्या मुखार हजर केले आनी उपरांत तांची सुटका केली.
पुलीस निरीक्षक विजय राणे हांच्या मार्गदर्शना खाला उपनिरिक्षक सुभाष गांवकार, प्रकाश गाडी, रामचंद्र साटेलकार, सनी काणेकार, हवलदार अनिल पिळगांवकार, पांडुरंग नायक, हवालदार संदीप मळीक, रामेश्वर गावस, सर्वेश कळंगुटकार, राजेश गावस, प्रसाद नायक, झिको वाझ, साईनाथ धुरी, ऋषिकेश कामत, प्रवीण पाटील, निखिल नायक, समीर नायक, अंकिता गडेकार, शामल च्यारी, गृहरक्षक रितेश गावस, लक्ष्मीकांत कौठणकार, अन्वी सावंत ह्या पंगडान ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
