भांगरभूंय | प्रतिनिधी
सकाळी उठून येरंडाच्या झाडाचो कुडको घेवन ताचेर कुपांदरेच्या फातराच्या पिठ्यान घासून घासून कातीक दार लावपाक रेंदेर बसला. दार येतगीर कातीर हात फिरोवन माड काडपाक दुदकें घेवन रेंदेर भायर सरता. पयली कोंकणदुदी सुकोवन ताचे दुदकें करतालें, अशे आयकलां, पूण आतां प्लास्टिकाचें वापरतना दिश्टी पडटा. माडाक पोंय फुटली काय तो सुरीक लायतात. माडार चडपाक सोपें जावचे म्हणून माडाक खांपां मारून घेतात. खांपार पाय दवरून रेंदेर माडाच्या कवळान वचून बसता. चुडटेच्या पासान पुराय पोंय घट्ट बांदता. मदीं मदीं पोंय कातीचे मुठीन धाडायता.
हे पोयेंक तीस दीस फक्त मार दितात. मागीर पोयेचें टोका कडल्यान चार आंगळां सोडून ती पोय कातरता. रोस पोयें वयल्यान सकयल गळूंक जायना म्हूण पोंदच्यान चुडट्यो दोडून त्यो घट्ट बांदतात. मागीर पोयेच्या पोंतार माट लायता. पोयेंतल्यान येवपी रोस माटान एकठांय जाता. दिसांतल्यान तीन वेळा रेंदेर माडार चडून पोय कातरता. ताका शेव घालता अशें म्हणटात.
रातच्या चांन्यांत सांठलेली सकाळीं काडलेली माडी पिवपाक थंड आनी बरी लागता. वताच्या रखरखांतली, सांजवेळार काडलेली माडी कडक आसता. एका माडा पासून दिसाक अदमासान एक लीटर माडी माटात गळटा. माडाक प्रत्येक म्हयन्याक एक पोय येता. माडी माटान गळता तेन्ना पोयेची कस वा गांजीलमूस माटान पडता म्हणून दुदक्यांतली माडी पितना ती गाळून पिवपाक जाय. माडी पिवपाक मस्त लागता. माडी पिले उपरांत पोट साफ जाता. जेवण चड वता. दुदक्यांतली माडी भाणांत सांठयतात. जशी काजूची फेणी काडटा तशी माडाची सूर (माडेंल) काडटात. दनपारच्या जेवणां पयलीं पाय एक ग्लास माडेंल पिता आनी भूस मारता. पावस पडलो तरी रेंदेर माडार चडटा. वर्सभर माडार चडून माडी काडटा. काय रेंदेर माडार चडटना सोबीत कातरां गुणगुणटात.
विनोद लक्ष्मण गावडे
9823547047
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
