भांगरभूंय | प्रतिनिधी
फोंडें, प्रतिनिधी ः माटोजे-शिगांव सोमारा सकाळीं सुमार 8 वरांचेर एका घराचेर पडिल्लें झाड काडपा खातीर वतना कुडचडे उजो पालोवपी दळाची गाडी आनी बोलेरो जीप हांचे मदीं अपघात जालो. ह्या अपघातांत जीप ड्रायव्हर फादर थॉमस रोड्रीगेज (वाकीकुळण- शिगांव) गंभीर जखमी जालो. जीपांत आडकून उरिल्ल्या आनी गंभीर जखमी जाल्ल्या ड्रायव्हराक दुसऱ्या उजो पालोवपी दळाच्या कर्मचाऱ्यांनी भायर काडलो. जाल्यार कुडचडें उजो पालोवपी दळाचो एक कर्मचारी किरकोळ जखमी जालो.
मेळिल्ले म्हायती प्रमाण, काऱ्यामळ- कुळें हांगा एका घरांचेर पडिल्ले झाड काजपा खातीर उजो पालोवपी दळाची गाडी क्रमांक जीए-07-जी-7557 सोमारा सकाळीं कर्मचाऱ्यांक घेवन वताली. माटोजेंच्या ओलताचेर अचकीत टायर पंचर जाल्ल्यान उजो पालोवपी दळाच्या गाडयेवयल्या ड्रायव्हराचो ताबो गेलो. त्या वेळार उरफाटे दिकेन येवपी जीए-07-के-8064 क्रमांकाचे बोलेरो जीपीक उजो पालोवपी दळाच्या गाडयेन धपको दिलो. त्या वेळार जीप ड्रायव्हर जखमी अवस्थेंत आडकून उरलो. थळाव्या लोकांनी रोखडेच दुसऱ्या उजो पालोवपी दळाच्या गाडयेक आपोवन जखमी ड्रायव्हराक भायर काडलो. जखमींक उपचारा खातीर कुडचडेंच्या भलायकी केंद्रांत दाखल केल्यात. उजो पालोवपी दळाचे उपसंचालक राजेंद्र हळदणकार हांणी अपघाताची पळोवणी केली आनी कुळें पुलिसांनी ह्या अपघाताचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
