भांगरभूंय | प्रतिनिधी
भांगरभूंय । प्रतिनिधी
वाळपयः ‘माझी भावस्पंदने’ हें चंद्रशेखर गांवस हाचे पुस्तक समाजांत शेणत चलिल्ल्या संवेदनांचेर भाश्य करता. पुस्तकांतल्या आमकां पर्यावरणांत जायत आशिल्ले भिरांकूळ बदल अणभवपाक मेळटात. गांवगिरी जीणे शैली पितारतना लेखकान न्हंयो, दोंगोर, झाडां, रुढी, परंपरा हाचो मनीस जिणे कडेन आशिल्लो लागींचो संबंद अधेरेखीत केला अशे मराठी अकादमीचो अध्यक्ष प्रा अनिल सामंत हाणे सांगलें. पुस्तकाच्या प्रकाशन कार्यावळींत ते उलयताले.
कार्यावळीक पर्यावरण अभ्यासक राजेंद्र केरकार, स्वामी विवेकानंद स्मृती संघ शिक्षण संस्थेचो अध्यक्ष नामदेव गांवस, डॉ प्रकास वझरीकार, विठ्ठल गांवस हाजीर आशिल्ले. वाचकांच्या मनातले प्रश्न लेखकाचे लिखणेंतल्या उपस्थीत जावपाक जाय. आमच्या आशी-कुशीक भरून आशिल्ली सुख- दुख्खां जर लेखक मांडपाक शकता जाल्यार तो वाचकांच्या काळजांत हात घालपाक येसस्वी जाता असें सामंत हाणे फुडें सांगलें.
चंद्रशेखर गांवस हाचे मदलो संवेदनशील लेखक भावस्पंदनांत आमकां मेळटा. समाजांतल्या साबार लोकांची असामान्य गुण खाशेलेंपण लेखकान वाचकां सामकार हाडला. आशी कुशीच्या वाठाराची पयलींची स्थिती आनी आजय जाल्ली दैना पुस्तकाच्या माध्यमांतल्यान आमच्या सामकार उबी रावता असें राजेंद्र केरकारान सांगलें. पुस्तकांतले महम्मद खान, केंवजो केरकार आनी कमला पळ ह्या व्यक्तिरेखांच्या घरच्यांचोय ह्या वेळार भोवमान केलो. प्रकाशन कार्यावळीक वाचक व्हडा प्रमाणांत हाजीर आशिल्ले. नामदेव गांवस हाचे उलोवप जालें. प्रकाशिका सुजन गांवस हिचे हस्तुकी मानेस्तांक यादस्तिकां भेटयलीं. दिवली पेटोवन कार्यावळीक सुरवात केली. येवकार दिवंन लेखक चंद्रशेखर गांवस हाणे प्रास्तावीक केलें. विठ्ठल शेळकेन सूत्रसंचालन केलें आनी वैष्णवी गांवस हिणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
