भांगरभूंय | प्रतिनिधी
लोकसभे खातीरचें मतदान गोंयांत 7 मेक जातलें. वेंचणुकेचें वारें व्हांवपाक लागलां. मुखेल राजकीय पक्ष आनी तांकां धिगी दिवपी हेर पक्षूय मतदारांक मेळपाक लागल्यात. फुडले 40 -50 दीस राजकी पक्षांचे फुडारी एकामेकांचीं कुतां भायर काडटले आनी तांचे समर्थकय तांकां तेंको दितले.
ह्या आदीं ज्यो वेंचणुको जाल्यात त्या वेळार माचये वयल्यान लेगीत फुडाऱ्यांनी आपल्या विरोधकांचेर वैयक्तीक टिका केल्या आनी तांचें नांव बदनाम केलां. अशे फुडारी आयज एकामेकांक वेंग मारतनाय दिसतात. तांचे कार्यकर्ते मात एकामेकांचेर राग धरून बसतात. ‘तूं आमच्या विरोधकाकूच आतां वेंग कशी मारता?’ असो प्रस्न विचारपाचें धाडस एकल्याय कार्यकर्त्याक जायना. कार्यकर्तो इतलो राजकारण्यांच्या रिणांत आसता? काय तो स्वता पुरतेंच पळयता.
सध्या दक्षीण गोंयांतलें राजकारण गोंयच्या लोकां खातीर चर्चेचो विशय थारलां. भारतीय जनता पार्टी कोणाक दवरता आनी काँग्रेस कोणाक दवरता होच विशय लोक उलयतना दिसतात. ह्या पक्षांनीय लोकां मदीं तशी उमळशीक निर्माण केल्या. गोंयच्या दोन जाग्यांक दिल्लींत तशें व्हडलेंशें म्हत्व ना, तरीय राजकारणांत आंकडो म्हत्वाचो आसता. एका मतान उमेदवार पडपाक शकता आनी एका वांगड्याक लागून सरकार घडोवपाचेंय उरपाक शकता. काठार पास जावपी सरकारां थीर उरतलींच काय ना होय प्रस्न आसता. हे खातीर थीर सरकार दिवपाक मतदारांचोय तितलोच तेंको जाय आसता. ‘वांगडी विकत’ घेवपाचे प्रकार जातकच राजकारणी आपूण मतदारसंघाचे उदरगती खातीर उडी मारल्या, अशें बेधडक सांगतात. हातूंतल्यान तो स्वताचें ‘अनाडीपण’ लोकां मुखार मांडटा. कित्याक तर विरोधकांत रावूनय कामां जातात, हाचीं उदाहरणां आसात. आनी कामां करून घेवपाक कळना जाल्यार कसले लोकप्रतिनिधी तर ते?
लोक प्रतिनिधींनी उडी मारतकच त्रासांत सांपडटात ते तांचे कार्यकर्ते. ज्या पक्षाक पोटतिडकेन विरोध केलो आतां तांच्याच आदेशांचें पालन तांकां करचें पडटा. राजकारण्यांक तें सदचेंच जाल्लें आसता, तत्वां आशिल्ले कार्यकर्ते आपले विचार बदलूंक शकतात? ते पुरायपणान त्या नव्या पक्षाचे जावंक शकतात? आनी आतांच्या तेपार वेंचून येतकच ‘कोणें कितलें केलां’ हें लोकांकय कळटा आनी दिसता.
आमच्यो वेंचणुको जायत आसतात. पंचायत, पालिका, विधानसभा, लोकसभा… म्हणजे दर देड व दोन वर्सांनी, केन्नाकेन्नाय रोखड्योच जातात. अशा वेळार कार्यकर्ते आपल्या उमेदवारा खातीर आपल्या वाड्या वयल्या आनी मतदार संघांतल्या विरोधकां आड झुजत रावतात. कित्याक ही सगळी तकालस? लोकप्रतिनिधीक जिखून येतकच दुसऱ्या पक्षांत धाडपाक?
हे आदीं ज्यो लोकसभेच्यो वेंचणुको जाल्यात आनी तेन्ना जे उमेदवार एकामेकांच्या विरोधांत आशिल्ले ते आयज एकाच पक्षांत सत्ता भोगतना दिसतात. हें चित्र दक्षीण आनी उत्तरेंतय दिसतलें. हे खातीर लोकांनी प्रचार करतना आपलो वाड्या वयलो (दुसऱ्या उमेदवाराचो कार्यकर्तो) हो दुस्मान न्हय हें मतींत दवरपाक जाय. नाजाल्यार आपल्या उमेदवारान उडी मारतकच स्वताकच लज जाता. गोंयच्या राजकारण्यां खातीर उडयो मारप हें सोंपें कशें जालां. हालीं चार वर्सांत तर दोगां विरोधी पक्ष फुडाऱ्यांनी हें करून दाखयलां.
बरें राज्य, बरो देश घडटलो जाल्यार थीर सरकार जायच जाय. तेच बराबर सरकाराक मद मारचो न्हय म्हूण विरोधकय जाय. हे वरवीं लोकशाय लेगीत जिवी उरपाक जाय. तिचो खून जावंक दिवंक जायना. तें मतदारांच्या हातांत आसता. पक्षांतर करपी फुडाऱ्यांक जर धडो शिकयलो जाल्यार फुडें तशें पावल मारपाचें कोण धाडस करतलो?
सध्या दक्षीण गोंयची सुवात जिखप हो भाजपा आनी काँग्रेस ह्या दोनूय राष्ट्रीय पक्षां खातीर एक प्रतिश्ठेचो प्रस्न जाला. भाजपाक जिखपा खातीर मगोची आनी काँग्रेसीक जिखपा खातीर आम आदमी पक्षाची गरज आसा. नाजाल्यार तांकां तें शक्य ना.
आम आदमी पक्षाचें ‘इंडिया आघाडी’ वांगडा सध्या नातें आसा. तरीय आसतना काँग्रेस उमेदवारुच जाहीर करिना म्हूण तांणी तांचो बाणावलेचो आमदार वेंझी विएगस हो दक्षीण गोंयचो उमेदवार म्हूण जाहीर केल्लो. उपरांत बोवाळ जातकच काँग्रेस आनी आपाचे गोंयचे अध्यक्ष दिल्लींत वचून बसका घेतकच हो घुस्पागोंदळ सुटलो. आपान उमेदवार फाटीं घेतलो.
भाजपा वांगडा मगो पक्ष आसा. ह्याच मगो पक्षाक भाजपान फाटल्या सरकाराच्या कार्यकाळांत सरकारांतल्यान भायर काडिल्लो. ते खातीर रागान मगो पक्षान फाटले लोकसभा वेंचणुकेंत काँग्रेसीक तेंको दिल्लो आनी तांचो उमेदवार जिखून हाडिल्लो. 2022 चे विधानसभा वेंचणुकेच्या दिसांनी (निकाल येवचे आदीं) मगोचे फुडारी आनी मडकयचे आमदार सुदिन ढवळीकार ‘कितेंय जाल्यार आपूण भाजपाक तेंको दिवचो ना’ अशें जाहीर म्हणटाले. कितें जालें? भाजपा कडेन सरकार घडोवपाक फावो तितलो आंकडो आसुनय आनी तांच्याच कांय आमदारांचो विरोध आसुनय सुदिन ढवळीकार हांकां परत सरकारांत घेतले आनी पेजाद मंत्रीपदूय दिलें. सुदिनबाब ढवळीकारानूय भाजपाची ‘मेकळ्या मनान’ तुस्त तोखणाय करीत मंत्रीपद स्विकारलें.
मगोचे अध्यक्ष दीपक ढवळीकार हांणी सध्या भाजपा विशीं आपली वाणी मात्शी गोड केल्या. ते म्हणटात, राजकारणांत कोण कोणाचे दुस्मान आसनात. म्हणल्यार ‘पर्मनेन्ट’ कांयच आसना. मागीर लोकांनी तरी आपल्या विरोधकां कडल्यान ‘पर्मनेन्ट’ दुस्मानकाय कित्याक घेवची? जो लोकशाय सांबाळपाक शकता ताका मत मारचें आनी सगळ्यां कडेन बरें वागचें… राजकारणा खातीर एकामेकाक आयुश्यभर गाळयो घालच्यो न्हय! कितले उद्दात विचार हे? आतां मतदारांक प्रतिक्षा आसा, मतदानाची… आनी मागीर जुनांत जावपी निकालाची.
समीर नायक
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
