भांगरभूंय | प्रतिनिधी
पणजी, प्रतिनिधी : कदंब कर्मचार्यांनी बुधवारा पणजेच्या आझाद मैदानाचेर सांखळी धरणें आंदोलन सुरू केलें. ह्या वेळार तांणी विंगड विंगड मागण्यो केल्यो. हातूंत सातव्या वेतन आयोगा विशीं कर्मचारी संघटणे वांगडा करार करप, ३४ म्हयन्यांची थकबाकी दिवप, २००९ आदल्या कर्मचार्यांक पुराय पगाराचेर १२ टक्के पीएफ लागू करप अश्या विवीध मागण्यांचो आसपाव आशिल्लो. ह्यो मागण्यो मान्य जाय मेरेन हें आंदोलन चालूच उरतलें. हे विशीं कामगार फुडारी वकील सुहास नायक हांणी म्हायती दिली.
खंयच्याय महामंडळांत सातवो वेतन आयोग लागू जाल्या उपरांत थंय काम करपी कामगार संघटने वांगडा करार करप गरजेचें. कदंब महामंडळान सातवो वेतन आयोग लागू केला, मात आजूनय ते विशीं करार करूंक ना. तो बेगीनूच करप गरजेचें. तशेंच कामगारांक आयोग लागू जाल्ल्याक ३४ म्हयन्यांनी थकबाकी दिवपूय गरजेचें अशें नायक हांणी म्हणलें.
महामंडळान नवीन भरती करचे पयलीं कंत्राटी कामगारांक कायम करचें अशीय मागणी आमी केल्या. आदीं कर्मचार्यांचो १२ टक्के पीएफ कापताले. मात महामंडळान कर्मचार्यांक सांगिनासतना ही रक्कम उणी केल्या. तशेंच गोंय- मुंबय, गोंय- शिर्डी ह्या मार्गा वयल्यो सेवा खाजगी बस चालकां कडेन दिवप, बदली चालकांक समान वेतन दिवप अश्योय मागण्यो आमी केल्यात, अशेंय नायक हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
