भांगरभूंय | प्रतिनिधी
पणजी, बातमीदार : कदंब कर्मचार्यांच्यो विवीध मागण्यो ६ मार्च मेरेन पुराय करपाचें आस्वासन मुख्यमंत्री डॉ. प्रमोद सावंत हांणी दिलां. मात ह्यो मागण्यो जर पुराय जावंक ना जाल्यार ६ मार्चा उपरांतूय आंदोलन चालूच उरतलें, अशी शिटकावणी कामगार फुडारी सुहास नायक हांणी शुक्रारा पणजे जाल्ले पत्रार परिशदे वेळार दिली.
फाटल्या २४ दिसां सावन विंगड विंगड मागण्यां खातीर कदंब कर्मचारी आझाद मैदानाचेर आंदोलन करतात. काल आमचे शिष्टमंडळ मुख्यमंत्र्यांक मेळ्ळें. तांणी ६ मार्चाक सगळ्यो मागण्यो पुराय करपाचें आस्वासन दिलां. हे खातीर आमी तांचे उपकारी. मुख्यमंत्री दिल्लो शब्द पाळटात. मात सरकारी नोकरी करप्यांनी तशें काम करचें, अशें नायक हांणी ह्या वेळार सांगलें.
खंयचोय वेतन आयोग लागू जाल्या उपरांत सरकारान कदंब कर्मचारी संघटणे वांगडा करार करप गरजेचें. आदल्या वेतन आयोगा वेळार असो करार केल्लो. मात ७ वें वेतन आयोग लागू जाल्या उपरांत करार करूंक ना. तशेंच आमी ३४ म्हयन्यांची थकबाकी दिवप, कापून घेतिल्लो प्रॉव्हीडांत फंड परत दिवप, नवी बस घेवप, समान काम समान वेतन दिवप आनी हेर मागण्योय केल्यात, अशें नायक हांणी सांगलें.
राजू मंगेशकार हेय ह्या वेळार हाजीर आशिल्ले. तांणी सांगलें, मुख्यमंत्र्यांनी जरी आस्वासन दिलें तरी सरकारी अधिकारी आनी वित्त खात्यांतले अधिकारी मागण्यो पुराय करपाक कळाव करतात. फकत कदंबूच न्हय जाल्यार हेर महामंडळांकूय हाचो अणभव आयला. आमी ६ मार्च मेरेन वाट पळोवन, उपरांत गांवांगांवांनी भोंवून कामगारांच्या मागण्यां विशीं जागृताय करतले. तशेंच आनीक खर आंदोलन करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
