भांगरभूंय | प्रतिनिधी
पयलींचे शिक्षिकेची बदली जाल्ल्यान भुरग्यांचे जाल्यात हाल
पणजी, प्रतिनिधी : मांद्रे नायकवाडो मुळावे सरकारी शाळेंतले शिक्षिकेची अचकीत बदली जाल्या आनी तिच्या जाग्यार नवीन शिक्षिका नेमुंक नाशिल्ल्यान भुरग्यांचे हाल जातात. देखून बेगीनूच हे शाळेत एके शिक्षिकेची नेमणुक करपाची मागणी करीत मांद्रेचे सरपंच प्रशांत नायक हांच्या फुडारपणा खाला पालकांनी आनी थळाव्यांनी शिक्षण संचालक शैलेश झिंगडे हांची भेट घेतली. फाल्यां मेरेन शाळेंत नवीन शिक्षिका नियुक्त करपाचें आश्वासन संचालकान पालकांक दिलां.
हे शाळेंत दोन शिक्षिका शिकयतात. अचकीत परिक्षा तोंडार आसतना एके शिक्षिकेची मदींच बदली केल्या. ‘3 मार्चाक बदली करपाचो आदेश शिक्षिकेच्या हातांत पडलो आनी जो मेरेन दुसरी शिक्षिका येना तो मेरेन पयलींचे शिक्षिकेची बदली जावचीना अशे अधिकाऱ्यांनी सांगिल्लें. पुण त्याच दिसा तिची बदली जाली. तिसरे ते चवथी मेरेनच्या विद्यार्थ्यांक शिक्षिका नाशिल्ल्यान तांच्या अभ्यासाचेर परिणाम जाला,’ अशे सरपंच प्रशांत नायकान सांगलें.
‘आमी सगळे थळावे आनी पालक मेळून शिक्षक संचालकांक मेळ्ळे. तांकां हे विशींचें निवेदनय भेटयलें. तांणी आमच्यो समस्या आयकून नवीन शिक्षिका फाल्यांच शाळेंत नेमपाचें आश्वासन दिलें आनी हो आदेश दिसांभितर काडटले अशे संचालकान कळीत केलां’ अशें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
