भांगरभूंय | प्रतिनिधी
पेडणें, प्रतिनिधी : मांद्रेंच्या सरपंचपदार मिंगेल उर्फ रोजा फर्नांडीस हांची विरोधाविणें निवड जाली. वट्ट णव पंच वांगड्यांनी तांचेर विस्वास दाखयिल्ल्यान फुडाराक उरिल्ल्या आठ पंच वांगड्यांक तीन- तीन म्हयने सरपंच म्हणून संद मेळटली.
मांद्रें पंचायत मंडळ २०२२ वर्सा स्थापन जाले उपरांत आदले आमदार दयानंद सोपटे हांचे समर्थक महेश कोनाडकार हांची सरपंच म्हणून निवड जाल्ली. मात २४ वरां भितर आनी पंच वांगड्यांचो सोपूत घेवचे पयलींच कोनाडकार हांचेर अविस्वास थाराव हाडून तो मंजूर केलो. ताका लागून दयानंद सोपटे हांकां फटको बशिल्लो. उपरांत आतांचे आमदार जीत आरोलकार हांणी अॅडवोकेट अमित सावंत हांच्या नेतृत्वा खाला वट्ट सात पंच वांगड्यांक घेवन रेडीच्या श्री गणपती देवळांत वचून अलिखीत करार केलो. तेन्नाच वट्ट सात पंच वांगड्यांनी आमी फुडलीं पांच वर्सांचो कार्यकाळ एकठांय रावन पुराय करतले अशें मागणें गणपती सामकार केलें.
ते प्रमाण सगळ्यांत पयलीं सरपंच म्हणून अमित सावंत हांची दोन वर्सां खातीर निवड करपाचें थारिल्लें. तेन्ना सावंत हांणी जर आपणें आनीक एक पंच वांगडी म्हणून सत्तारूढ गटांत हाडल्यार आपल्या स म्हयन्यांचो कार्यकाळ हो सरपंच म्हणून मिंगेल फर्नांडीस हांकां स म्हयने सरपंच म्हणून कार्यकाळ दितलों, अशें देवळांत थारिल्लें. ते प्रमाण सरपंच म्हणून अमित सावंत हांची दोन वर्सां खातीर निवड जाल्ली. दोन वर्सांच्या कार्यकाळाक स म्हयने उरिल्ले तेन्ना तांणी राजिनामो दिलो आनी फुडल्या स म्हयन्यां खातीर सरपंच म्हणून मिंगेल हांची निवड करपा खातीर मार्ग मेकळो केलो. मात तसो करार हेर पंच वांगड्यांक पडूंक नाशिल्ल्यान तेन्नाच सरपंच म्हणून प्रशांत उर्फ बाळा नायक हांची निवड जाली. तांचेर स म्हयन्यां पयलींच अविश्वास थाराव हाडलो. चवथीच्या दिसांनीच तांकां आपलें कदेल सोडचें पडलें. ताका लागून हें पद फाटल्या पंदरा दिसां सावन रितें आशिल्लें.
२७ तारखेर मांद्रें पंचायत मंडळाची विशेश बसका आयोजीत करून सरपंच पदा खातीर वेंचणूक घेतली. ह्या वेळार सरपंच पदा खातीर मिगेल हांचो एकूच अर्ज आयिल्ल्यान तांची विरोधाविणें निवड जाल्ल्याचें जाहीर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
