भांगरभूंय | प्रतिनिधी
पेडणें, प्रतिनिधी: मांद्रें पंचायत वाठारांतल्या दोंगराचेर वट्ट एक लाख वीस हजार चौरस मिटर जमीन आसा. थंय घरां ना, शेतां ना. ही जमीन नो डेव्हलपमेंट झोनांत येता. ही जमीन नगरनियोजन खात्यान मांद्रें पंचायत, मांद्रें ग्रामस्थांक विस्वासांत घेनासतना ‘सेटलमेंट झोनां’त रुपांतरीत केल्या. हाचो मांद्रें पंचायत मंडळान खर निशेध करून ही जमीन आदले वरी ‘नो डेव्हलपमेंट झोनांत’ घालची. ना जाल्यार परत झोनींग विशय वयर काडटले. तशेंच खास ग्रामसभा आपोवन जमीन नगरनियोजन खात्या आड आवाज करतले, अशी शिटकावणी पत्रकार परिशद घेवन दिली.
मांद्रें सरपंच बाळा उर्फ प्रशांत नायक, उपसरपंच तारा हडपफडकार, पंच वांगडी किरण सावंत, पंच वांगडी संपदा आजगांवकार, पंच वांगडी चेतना पेडणेंकार, पंच वांगडी महेश कोनाडकार, पंच वांगडी मिगेल फर्नांडीस, पंच प्रशांत मांजरेंकार आनी हेर ह्या वेळार हाजीर आशिल्ले.
मांद्रे सरपंच नायक हांणी, फाटल्या स म्हयन्यां पयलीं ह्या म्हालांतल्या जमीन आराखड्या विशीं व्हडा प्रमाणांत चळवळ आनी आंदोलनां जाल्लीं. ताचे उपरांत सरकारान पेडणें झोनींग प्लान रद्द केल्लो. मात हांगची ‘नो डेव्हलपमेंट झोनां’त येवपी जमीन सध्या ‘सेटलमेंट झोनां’त घाल्या. फाटल्यान परत सेटलमेंट झोन करपाचे प्रकार सुरू आसात. खंयच्याच थळाव्या नागरिकांनी अशी जमीन सेटलमेंट झोनांत घालपाची मागणी करूंक ना. जर खंयच्याय रस्त्याच्या कुशीक थळाव्यांच्यो सुमार २०० मिटरच्यो जमनी आसल्यार त्यो झोनिंग प्लानांत घाल्ल्यो जाल्यार ताचो लाव थळाव्यांक मेळपाचो. मात बिगर गोंयकारांच्या नांवान अश्यो जमनी सेटलमेंट झोनांत घालप योग्य? असो प्रस्न करून जर सरकार बदल करिना जाल्यार आमकां रस्त्यार येवन परत आंदोलन करचें पडटलें, ना जाल्यार खास ग्रामसभा आपयतले अशी शिटकावणी तांणी दिली. मुख्यमंत्री प्रमोद सावंत आनी हेर मंत्र्यांक निवेदन दिवन मागणी करतले अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
