भांगरभूंय | प्रतिनिधी
हरमल, बातमीदार: मांद्रें पंचायत वाठारांतल्या आस्कावाड्यार पिवपाचें उदक नाशिल्ल्यान हांगच्या लोकांक बरेच त्रास सोंसचे पडटात. एप्रील म्हयन्यांतूच उदक नाशिल्ल्यान बायलांनी तिडक उक्तायल्या. तशेंच पर्वरी उदका पुरवण खात्याक निवेदनूय धाडलां. ह्या निवेदनाच्यो प्रती थळावे मांद्रेंचे आमदार जीत आरोलकार आनी सरपंच प्रशांत नायक हांकां दिल्यात. हाचेर कितें उपाय घेतले हाचे कडेन सगल्यांचें लक्ष लागलां.
पयर आस्कावाड्या वयली रुक्मिणी म्हामल आनी सुमार ५५ बायलांनी पर्वरी उदका पुरवण अधिकार्यांक निवेदन दिलें. ह्या वाड्यार उदक सोडटना मुद्दम उण्या दाबाची उदका पुरवण करतात काय? असो प्रस्न ह्या वेळार बायलांनी उक्तायलो. हे उदकाचे त्रास फेब्रुवारी म्हयन्या सावन चालूच आसात. हाका उदका पुरवण खात्याचो एक कर्मचारी जापसालदार आसा. ताचे कडल्यान जाय तशीं कामां जायनांत अशें निवेदनांत म्हणलां. ताचें नांवूय निवेदनांत दिलां.
कर्मचार्यांची बदली गरजेची
उदका पुरवण खात्यान फेब्रुवारी ते मे महिन्यां मेरेन दरेका गांवच्यो कागाळी आसतात. चडश्यो कागाळी ह्या गांवांतलो कर्मचारी आसल्यार आसतात, हो अणभव आसा. त्या गांवांतलो कर्मचारी कोणाच्या तरी चेंपणा खाला येवन उदकाचे पुरवणेंत बदल करीत आसता. ताचो फटको नागरिकांक बसता. ताका लागून ह्या चेंपणा खाला ‘अर्थपूर्ण’ वेव्हार जाल्ल्याचो दुबाव कांय जाणांनी उक्तायला. ताका लागून खात्यान असल्या कर्मचार्यांची हेर गांवांनी बदली करची अशी मागणी जाता.
उदका पुरवण खात्यान हे विशीं फुडल्या दोन म्हयन्यांची स्थिती लक्षांत घेवन कर्मचार्यांनी कसल्याच चेंपणा खाला येवचें न्हय, अशी मागणी ग्रामस्थांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
