भांगरभूंय | प्रतिनिधी
पावसाक लागून शेतकारांचें लुकसाण
कोरगांव, प्रतिनिधी ः मांद्रें पंचायतींतल्या दांडोसवाडो वाठारांतल्या शेतकारांचें अंदूं व्हड प्रमाणांत लुकसाण जाला. त्या शेतकारांक योग्य ती लुकसाण भरपाय मेळपाक जाय. हे खातीर आमी आठ दिसां आदीं मुख्यमंत्री डॉ. प्रमोद सावंत हांचे कडेन चर्चा केल्ली. शेतकारांचे प्रस्न मांडले. आनी मुख्यमंत्र्यान बेगीनूच लुकसाण भरपाय दिवपाचे आश्वासन दिले. ते प्रमाण 15 दिसां भितर लुकसाण जाल्ल्या शेतकारांक भरपाय दिवपा खातीर सरकार सगले यत्न करतले अशें आमदार जीत आरोलकार हांणी सांगलें. तांणी शेतकारांक भेट दिवन लुकसाण जाल्ल्या शेताची पळोवणी केली. ते उपरांत पंदरा दिसां भितर शेतकारांक लुकसाण भरपाय दिवपाचें आश्वासन दिलें.
आरोलकार हांणी उलयतना सांगलें, शेतकार खूब मेहनत घेवन शेती करतात. हे खातीर केंद्र सरकार आनी राज्य सरकार शेतवडींतल्यान वेगवेगळ्यो येवजण्यो तांका दितात. ताचोय फायदो शेतकारांनी घेवचो. पूण कांय सैमीक घडणुकांक लागून शेतकारांक व्हड लुकसाण जाता. ती भरपाय शेतकारांक दर वर्सा मेळपाक जाय. हे खातीर सरकार सगले यत्न करता. आनी सरकार तांकां फावो तें मानधनूय दिता अशें आरोलकार हांणी सागलें. फाटल्या म्हयन्या सावन पडपी उटंगाराच्या पावसाक लागून अंदूं ह्या वाठारांतली शेती पयलेच खेपे नश्ट जाल्या आनी शेतकारांक खूब लुकसाण जाले. लुकसाण जाल्ल्या शेतकारांक 15 दिसां भितर लुकसाण भरपाय मेळोवन दितलों. तांणी शेत रोंवप चालू दवरचें अशें जीत आरोलकार हांणी हे वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
