भांगरभूंय | प्रतिनिधी
पणजी: मांडवी न्हंयेंत एका ऑफशोर कॅसिनो लागसार एक अनवळखी कूड उफेतना मेळिल्ल्यान बुधवारा सकाळीं पणजे बरोच बोवाळ जालो. हे विशीं मेळिल्ले म्हायती प्रमाण, मांडवी न्हंयेंत उबी आशिल्ले बोटी लागसार कांय नागरिकांक एक कूड उफेतना दिसली. उपरांत हे विशींची म्हायती उजो पालोवपी दळ आनी आपत्कालीन सेवा दळाक दिली. जवान रोखडेच घडणुके सुवातेर दाखल जाले.
उजो पालोवपी दळाच्या अधिकार्यांनी दिल्ले म्हायती प्रमाण, बुधवारा सकाळीं सुमार १०:३१ वरांचेर नियंत्रण कक्षाक हे विशींची म्हायती मेळिल्ली. उपरांत पणजी उजो पालोवपी केंद्राचे जवान मजत आनी रेस्न्यू सामाना सयत बेगोबेग मांडवी न्हंयें कडेन दाखल जाले. रेस्क्यू टिमीच्या जवानांनी अनवळखी मनशाची कूड न्हंयेंतल्यान भायर काडली.
सध्या उजो पालोवपी दळान ही कूड फुडले कायदेशीर प्रक्रिये खातीर पणजी पुलिसांचे सुवादीन केली. मरण आयिल्ल्या मनशाची वळख आजून पटूंक ना. मरणाचें नेमकें कारण कितें हे विशींची म्हायती मुखार येवंक ना. पणजी पुलीस हे विशीं फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
