भांगरभूंय | प्रतिनिधी
सैमाचें देणें आशिल्ल्या गावांत एके न्हंयचे देगेर जाणटेलो रावतालो. ताचें नांव शंकर. आपली भलायकी बरी उरपा खातीर तो सदांच सकाळचो पासयेक वतालो. पासय मारून येतना. दिसाळें, दुद , नुस्तें घेवन येतालो. केन्नाय पोरसांतली भाजी मेळटा जाल्यार तांबडी भाजीय घेवन येतालो. तांगेर एक माजर आशिल्लें. तें सगळ्यालें अपूरबायेचें आशिल्लें. नुस्तें उजरावपाच्या वेळार आडवळेक आपलें आंग घशटीत रावतालें. चेचुडां सामकी कुरूकुरू खातालें. शेजराचें माजर येत जाल्यार ताच्या ताळ्यार एकूय चेंचूंड पडपाची माणसुकी नाशिल्ली . नुस्तें उजरायतना ताचे कडेन पयस चेंचूंड पयस शेवटून उडयलें जाल्यार रागान तिचे कडेन पळयतालें. ताका दिवनाका म्हूण काकुळटेन तिच्या तोंडाक पळयतालें.
शंकर आपलो सकाळचो नाश्ता करतालो. न्हावन देवाचें करून मागीर ताचें दिसाळें पुराय चाळून काडटालो आनी कांय तांतूंतल्यो गजाली घरकान्नी कानार घालतालो. माजराक कांय कळनाशिल्लें. पूण लक्ष दिवन आपल्या भशेन आयकतालें.. तशें तें माजर सामकें शिटूक आशिल्लें . जल्ले, पाली ,हुंदीर ताच्या वासाक राविनाशिल्ली.
शंकरालें वोलतेर आशिल्लें. चडावत वेळ तो तातूंत बसतालो. माजराकूय त्या वोलतेरांन न्हिदपाची सवय जाल्ली. जुस्त रातची धा वरां जालीं काय ना शंकराक येवन घश्टतालें तुजो न्हिदपाचो वेळ जालो म्हूण ताका शिटकायतालें. आपलेपरीन तें शंकराचे पांय चेपतालें. मागीर तो न्हिदपाक भितर वतालो.
एक दीस अचकित माजर सदचे परस बेगीन वोलतेरा म्हऱ्यान येवन भियेल्ल्या आवाजान म्यांव म्यांव करूंक लागलें. शंकराक कांयच कळलें ना. भूक लागली जायत म्हूण दूद पिवपाक दिलें ताणें तोंड लावंक ना. देवा कुडी कडेन वचून वचून परतें येतालें. शंकरान रोखडेंच वचून देवा कुडीन वचून पळयलें . पळय जाल्यार कितें तरी लाशिल्ल्याचो वास येतालो. कपडे सुकत घाल्ली दोरी तुटून सकयल पडिल्ली. जुस्त शंकरालो कोट दिव्याचेर पडिल्ल्यान ताका मात्सो उजो लागिल्लो . . बेगीन बेगीन शंकरान उजो पालयलो. माजराचे शिटुकसाणेन व्हडलो अनर्थ जावपाचो उरलो.
माजराक खूब खोशी जाली . आपणें धनयाक आपलेपरीन वाटायलो हाची आनी शंकराक येवन घशटूपाक लागलें. ताका वेंगेन घेवन ताणे अपुरबाय केली आनी
ताका विचाल्ले. तुका इनाम म्हूण दूद जाय काय नुस्तें जाय. कांय जाप दिनास्ताना हेवटेन तेवटेन उडक्यो मारूंक लागलें. शंकराक ताका नुस्तें आनी दूद दोनूय दिलें. येतिश्ट माजरान ताव मारलो. मागीर आसा तशें आपल्या सदच्या जाग्यार वोलतेराचेर गुटली करून न्हिदलें ऽऽऽ
अलका सिनाय असोळडेकार
9822981107
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
