भांगरभूंय | प्रतिनिधी
वास्को, प्रतिनिधी: मांगोरहिलच्या अमन विव्हेंडा हे इमारतीच्या टॅर्रसाचेर मंगळारा वीज पडिल्ल्यान टॅर्रसाचें कांय प्रमाणांत लुकसाण जालां. तशेंच लिफ्ट, जनरेटर हांचे सयत थळाव्यांचे टिव्ही, इन्व्हर्टर, फॅनांचें लुकसाण जालां. हे विशीं आमदार दाजी साळकार हांणी बुधवारा भेट दिवन पळोवणी केली. आपत्कालीन वेवस्थापना खाला कितेंय मजत ह्या थळाव्यांक मेळची म्हणून आपूण यत्न करतलों अशें तांणी सांगलें.
हांगा मंगळारा सांजेवेळार नेटान वारो, वीज, गडगडा सयत पावस सुरू जालो. ताचो परिणाम सदचे जिणेचेर जालो. मांगोरहिलाच्या हे इमारतीचेर वीज कोसळ्ळी. हाका लागून सिमेंट, चिरे तशेंच हेर गजालींचें लुकसाण जालें. वीज इमारती कुशीक आशिल्ल्या झाडाकूय तेंकून गेल्ल्यान झाडा पोंदाक पार्क केल्ले गाडयेचेंय लुकसाण जालें.
मजगतीं, बुधवारा सकाळीं आमदार साळकार हांणी नगराध्यक्ष गिरिश बोरकार, मामलेदार प्रविणजय पंडित, तलाठी गौतम सांळुखे आनी हेरां सयत थंय भेट दिवन पळोवणी केली. हे विशीं थंयच्या लुकसाणाचो अहवाल तयार करून तो जिल्होधिकारी कार्यालयाक दितले अशें मामलेदार पंडित हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
