महाराष्ट्रूय उदक घुंवडावपाच्या यत्नांत

भांगरभूंय | प्रतिनिधी

विर्डी वाठारांत म्हादयचेर काम नेटान सुरू; कामाक केंद्रीय रानां मंत्रालयाची मान्यताय नाः प्रो. केरकार

पणजी : कर्नाटका उपरांत आतां महाराष्ट्रा कडल्यान लेगीत म्हादयचें उदक घुंवडावपाचो यत्न सुरू आसा. हाका लागून गोंया खातीर म्हादयच्या उदकाचो धोको वाडत आसा. विर्डी वाठारांत महाराष्ट्रा कडल्यान धरणाचे मुळावें काम सुरू आसा. पर्यावरण कार्यकर्ते राजेंद्र केरकार हांणी विर्डी वाठाराक भेट दिवन ही म्हायती दिली.

गोंया लागींच्या दोडामार्ग म्हालांत विर्डी गांव येता. ह्या वाठारांत डोजर माती काडपाचें काम करतात जाल्यार ट्रक माती भरून व्हरतना दिसतात. विर्डी धरणाचें काम कंत्राटदारा वतीन सुरू आसा. ह्या कामाक केंद्रीय रानां मंत्रालयाची मान्यताय ना. ओरोस फांट्याच्या कार्यकारी अभियंत्यांच्या आदेशान काम सुरू आसा अशें कामगारांनी सांगिल्ल्याचें प्रो. राजेंद्र केरकार हांणी सांगलें.. हांवें काल (आयतारा) वाठाराक भेट दिली. दोंगर सपाट करून ट्रकांतल्यान माती व्हरपाचें काम सुरू आशिल्लें अशें प्रो. राजेंद्र केरकार हांणी सांगलें.

विर्डी गांव सिंधुदुर्ग जिल्ह्यांत येता. ह्या रान वाठारांत झाडां आसात. केंद्रीय रानां मंत्रालयाचो परवानो नासतना हें काम सुरू आसा अशें प्रो. राजेंद्र केरकार हांणी सांगलें.

कळसा आनी भांडुरा प्रकल्पाच्या माध्यमांतल्यान म्हादयचें उदक घुंवडावपाचे कर्नाटकाचे यत्न खूबशीं वर्सां सुरू आसा. कळसा – भांडुरा प्रकल्पाच्या आराखड्याक (डीपीआर) कर्नाटका कडल्यान मान्यताय मेळिल्ल्यान गोंयांत खवदळ पडला. गोंयांत म्हादयच्या उदका खातीर कर्नाटका आड आंदोलन सुरू आसा. कर्नाटका कडल्यान म्हादयचें उदक घुंवडावपाचो यत्न सुरू आसतना आतां विर्डी हांगा म्हादयचेर धरण बांदपाचो यत्न महाराष्ट्राचे आसात. हाका लागून आतां गोंयाक महाराष्ट्रा कडेन लेगीत झगडचें पडटलें.

म्हादयचो उगम कर्नाटकांत जाता. कर्नाटका उपरांत महाराष्ट्रांतल्यान ही न्हय गोंयांत येता. म्हादय लवादान कर्नाटका सयत महाराष्ट्राक लेगीत उदकाचो कांय वांटो दिला. गोंय आनी कर्नाटका सयत महाराष्ट्रान लेगीत म्हादय लवादाच्या आदेशाक आव्हान दिलां.

गोंय सरकारान कर्नाटका आड सर्वोच्च न्यायालयांत अवमान याचिका दाखल केल्या. तशेंच कर्नाटकाक रानां संरक्षकानी नोटीस जारी केल्या. महाराष्ट्रा आड मात गोंय सरकारान कसलीच कारवाय करूंक ना. विर्डी धरणा वरवीं म्हादयचें उदक घुंवडावपाचो महाराष्ट्राचो यत्न पोरणो आसा. मात हें काम बंद आशिल्लें. आतां तें काम परतून नेटान सुरू आसा. म्हादयचें पात्र कर्नाटक, महाराष्ट्र आनी गोंय ह्या तिनूय राज्यांनी आशिल्ल्यान हो प्रस्न तिनूय राज्यांचो आसा. म्हादयच्या उदकाचेर नदर दवरपा खातीर प्रवाह ही उदका नियंत्रण प्राधिकरण स्थापन करपाक केंद्रान मान्यताय दिल्या. संसद अधिवेशन सोंपले उपरांत प्रवाह प्राधिकरणाची अधिसुचोवणी जारी जातली अशें मुख्यमंत्री डॉ. प्रमोद सावंत हांणी विधानसभेंत स्पश्ट केलां.

महाराष्ट्रा कडल्यान विर्डी धरणाचें काम सुरू जाल्ल्यान गोंय सरकाराची तकली फोड वाडल्या. गोंय सरकाराक विर्डी धरणा विशीं कसलीच म्हायती मेळूंक ना.

कर्नाटका आड गोंय सरकारान सर्वोच्च न्यायालयांत अवमान याचिका दाखल केल्या. ह्या अवमान याचिकेचेर जुलयात सविस्तर सुनावणी जातली. सर्वोच्च न्यायालयांत फेब्रुवारींत हे याचिकेचो उल्लेख जाल्लो. आवश्यक ते परवाने घेतले बगर कळसा – भांडुरा प्रकल्पाचें काम सुरू करचे नात, अशी हमी कर्नाटकान सर्वोच्च न्यायालयांत दिल्या. सर्वोच्च न्यायालयांत कर्नाटकान हमी दिल्ली आसली तरी कर्नाटकाचे मुख्यमंत्री बसवराज बोम्माई हांणी कळसा – भांडुरा प्रकल्पा खातीर अर्थसंकल्पांत निधीची तजवीज केल्या. कळसा – भांडुरा प्रकल्पाचो आराखडो मान्य जाल्ल्यान कर्नाटक आतां प्रकल्पाचें काम सुरू करतलें. अशें कर्नाटकाचे मुख्यमंत्री तशेंच हेर मंत्री सांगतात.

सरकारान विर्डीचें काम बंद करचें : युरी आलेमांव

भारतीय जनता पक्षाच्या चौथ्या इंजिनाक लागून आतां महाराष्ट्रा कडल्यान आतां विर्डी धरणाचें काम सुरू जालां. गोंय सरकारान हें काम बंद करपाक जाय अशें विरोधी पक्ष फुडारी युरी आलेमांव हांणी म्हणलां. भाजप सरकारान म्हादय विकपाची प्रक्रिया सुरूच दवरल्या असो आरोप तांणी केलाे. म्हादयचें उदक वाटवपाक भाजप सरकार अपेशी थारला अशें युरी आलेमांव हांणी म्हणलें.

गोंयान सादूर रावचें पडटलें

भुंये पोंदच्यान कानाल आनी बोगद्यांतल्यान उदक घुंवडावपा खातीर महाराष्ट्रान हाचे पयलींच येवजण आंखिल्ली. आतां नव्यान काम सुरू केल्ल्यान गोंयान सादूर रावचें पडटलें. विर्डी धरणाची उंचाय 48.375 मिटर आसून लांबाय 736 मिटर आसा. ह्या धरणाच्या माध्यमांतल्यान 14.138 एमसीएम उदका सांठो उपलब्ध करपाचें महाराष्ट्राचें नियोजन आसा.