भांगरभूंय | प्रतिनिधी
भांगरभूंय । प्रतिनिधी
बेळगांवः महाराष्ट्र सरकारांतले मंत्री शंभूराज देसाय आनी चंद्रकांत पाटील हांका मंगळारा 6 डिसेंबराक बेळगांव येवपाक बेळगांव जिल्हो प्रशासनान बंदी घातिल्ल्या कर्नाटक आनी महाराष्ट्राच्या शीम वाठारांत तणावाची परिस्थिती उप्रासल्या. कर्नाटकाचे मुख्यमंत्री बसवराज बोम्मय हांणी महाराष्ट्राचे मुख्यमंत्री एकनाथ शिंदे हांका तांच्या मंत्र्यांक बेळगांवात धाडचें न्हय, अशें मागलां.
सर्वोच्च न्यायालयांत आशिल्ल्या महाराष्ट्र- कर्नाटक शीम वाठारा संबंदीचे याचिके संबंदीत महाराष्ट्र सरकारान स्थापन केल्ले तज्ज्ञाचे समितीचो मुखेली हातकणंगलेचो खासदार धैर्यशील माने हे लेगीत मंत्र्या वांगडा बेळगांवात येवपाचे आसात. बेळगांव जिल्ह्याचो उपायुक्त नितेश पाटील हाणी जिल्हो न्यायदंडाधिकारी ह्या नात्यान देसाय आनी पाटील हांका बेंळगांवात येवपाक बंदी हुकूम जारी केला. जिल्हो प्रशासनाक पयली सादर केल्ले भोंवडी कार्यावळी प्रमाण महाराष्ट्राचे दोनूय मंत्री 3 डिसेंबराक बेळगांवात येवपाचे आशिल्ले. मात ते 6 डिसेंबराक येतले. हे मंत्री बेळगांवात आयल्यार कायदो आनी सुवेवस्थेचो प्रश्न उप्रासतलो अशें बेळगावंचो पुलीस आयुक्त आनी बेळगांव जिल्हाच्या पुलीस अधिक्षकान आमकां कळीत केल्ल्यान मंत्र्यानी बेळगांवात येवचें न्हय अशें आमी तांका कळीत केला. ताणी तें मानून घेतलें ना जाल्यार आमकां कारवाय करची पडटली अशें नितेश पाटील हांणी सांगलें.
कर्नाटकाचे मुख्यमंत्री बोम्मय हांणी महाराष्ट्राच्या मंत्र्यांक बेळगांवत येनाकात अशें सांगलां. आमचे खातीर कर्नाटक आनी महाराष्ट्रा मदलो शीम वाद सोपला. हे मंत्री बेळगांवात आयल्यार शांतता भंग जातलो आनी आमकां कारवाय करची पडटली अशी शिटकावणी तांणी दिल्या.
मजगतीं, कन्नड रक्षण वेदिकान सोमाराक बेळगांवच्या राणी चन्नम्मा सर्कला कडेन महाराष्ट्राच्या मंत्र्यांक बेळगांवात येवपाक बंदी घालची हे मागणे खातीर निदर्शना केलीं. ह्या मंत्र्याचे भेटीक लागून शांतता भंग जातलो अशी शिटकावणी तांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
