भांगरभूंय | प्रतिनिधी
म्हापशें: धारगळ, पेडण्यां प्रवेश शुल्क बुथाची तोडफोड आनी सरकारी कर्मचाऱ्यांक मारपेट प्रकरणांत महाराष्ट्राचे नुस्तें वेवसाय मंत्री तशेंच कणकवलीचे आमदार नितेश राणे हे सोमारा म्हापशें न्यायालयांत हजर जाले. न्यायालयांत गैरहाजीर राविल्ल्यान न्यायालयान फाटल्या शेनवारा राणे हांचे आड जामीनपात्र वॉरंट जारी केल्लें.
काल (सोमारा) नितेश राणे हे म्हापशेंच्या पयलो वर्ग न्यायालयांत प्रत्यक्ष हजर जाले. न्यायालयान तांचो वयल्या खटल्यांत अधिकृत जबाब नोंद करून घेतलो आनी ह्या प्रकरणाची फुडली सुनावणी 9 जुलय मेरेन मुखार धुकल्ली.
नितेश राणे हांचे वकील अॅड. अभय चिखलीकर हांणी पत्रकारां कडेन उलयतना सांगलें की, आपलो अशील नितेश राणे हांणी न्यायालयाच्या निदेशाक पाळो दिला. ते स्वता सुनावणी खातीर हजर रावले. 4 जुलय दिसा महाराष्ट्रांत रेड अलर्ट आशिल्ल्यान तशेंच कांय कारणां खातीर ते गोंयांत पावूंक शकले नात.
मजगतीं, हें प्रवेश शुल्क बूथ थोडफोड प्रकरण 3 डिसेंबर 2013 दिसा दोन खांब, धारगळे घडिल्लें. गोंय सरकारान गोंया भायल्या राज्यांतल्यान येवपी वाहनांक प्रवेश शुल्क लागू केल्लो. हें शुल्क दिवपाक न्हकार दिवन नितेश राणे आनी तांच्या पंगडांतल्या सहकाऱ्यांनी कर्मचाऱ्यांचेर हल्लो करून बुथाची मोडतोड केल्ली.
ह्या प्रकरणांत पेडणें पुलिसांनी सरकारी कर्मचाऱ्यांक मारपेट आनी भौशीक मालमत्तेचें लुकसाण हाचे सयत हेर आरोपा खाला गुन्यांव नोंद केल्लो. तशेंच राणे हांचे सयत राहूल परब, मुकूंद परब, हरिश्चंद्र परब, राकेश परब, प्रशांत मळकर, विनम्र आचरेकर, सागर पाटील आनी संतोष राऊत हांकां अटक केल्ली. पुलिसांनी ह्या दुबावितां आड न्यायालयांत आरोपपत्र सादर केले उपरांत न्यायालयांत खटल्याची सुनावणी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
