भांगरभूंय | प्रतिनिधी
भांगरभूंय । प्रतिनिधी
फोंडेंः शिरोडा मतदारसंघांत भाजपाचें कमळ फुलोवपाक म्हत्वाचें योगदान दिवपी आदलो मंत्री महादेव नायक हाका परत पक्षांत हाडपा खातीर यत्न सुरू जाल्यात. लोकसभा वेंचणुकेचे फांटभुंयेर ताका पक्षांत हाडून शिरोडें मतदारसंघात पक्षाची उमेदवार पल्लवी धेंपो हिची आघाडी वाडोवपाचें लक्ष्य पक्ष फुडाऱ्यांनी दवोरला. महादेव नायक हाका भाजपात हाडल्यार तांकां निश्चीत आघाडी मेळपाक शकता. राजकी दुस्मान आशिल्ले मंत्री सुभाष शिरोडकार आनी महादेव नायक भाजपाचे माचयेर दिसपाक शकतले.
महादेव नायक हाका भाजपात घेवपा खातीर जाल्ली चर्चा येसस्वी जाल्या. काँग्रेस पक्ष आमदार सुभाष शिरोडकार हाणे 2019 वर्सा भाजपांत प्रवेश केल्ल्यान आनी उपरांत जाल्ले पोटवेंचणुकेंत ताका पक्षान तिकेट दिल्ल्यान महादेव नायकान पक्ष सोडल्लो. पूण आतां लोकसभा वेंचणुकेचेर दोळे दवोरून ताका परत पक्षांत घेवपाचें थारलां. शिरोडें मतदारसंघात महादेव नायकाक बरे समर्थन आसा हाची दखल भाजपाच्याा फुडाऱ्यांनी घेतल्या. पल्लवी धेंपो हिका वेंचून हाडपाचें आव्हान थळाव्या भाजपा फुडाऱ्यांनी स्विकारलां. ताका लागून सुभाष शिरोडकार आनी महादेव नायक हाका एके माचयेर हाडपाचें तांणी थारायलां.
महादेव नायक हाणे 2007 वर्सा जाल्ली विधानसभा वेंचणूक भाजपाचे तिकेटीचेर लडोवन तो आमदार जाल्लो. 2012 वर्सा जाल्ले विधासभा वेंचणुकेत ताणे परत जैत मेळयलें आनी भाजपा सत्तेर आयिल्ल्यान मनोहर पर्रीकार मंत्रिमंडळांत ताका उद्देग मंत्री केल्लें. 2017 वर्सा जाल्ले वेंचणुकेंत सुभाष शिरोडकार हाणे ताका हारयल्लें. उपरांत जाल्ले राजकी घडणुकांत महादेव नायकान काँग्रेस आनी आम आदमी पक्षांत वचून राजकी फुडार साल्वार करपाचो यत्न केलो मात तातूंत ताका अपेश आयलें.
आपल्याक भाजपांत येवपाची ऑफर दिल्या. ते संबंदांत आपूण फावो तो निर्णय घेतलों. आपणे पक्षा खातीर केल्ल्या कामाची पक्षाच्या फुडाऱ्यांक कल्पना आसा. रोखडोच आपलो निर्णय तांकां कळयलों, अशें महादेव नायकान ताचे कडेन संपर्क सादलो तेन्ना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
