भांगरभूंय | प्रतिनिधी
म्हापशें पालिके कडल्यान कारणां दाखय नोटीस
म्हापशें: दत्तवाडी, म्हापश्यां मसंडभुंयेचे उक्ते सुवातेंत बेकायदो सुरू आशिल्ल्या वादग्रस्त शेडीच्या बांदकामाक म्हापशें पालिकेन काम बंदचो आदेश कंत्राटदार कंपनीक जारी केला.
फाटल्या कांय दिसां सावन हे सुवातेंत क्रेनीच्या आदारान हें पक्के बांदकाम सुरू आसा. ह्या शेडीचें बांदकाम गतीन सुरू आसा. हांगा एका राजकी फुडाऱ्याची भागिदारी आशिल्ल्या ऑटोमोबायल कंपनीचें वकॅशॉप उबारीत आशिल्ल्याची चर्चा शारांत आसा.
ह्या बांदकामा आड एक मनशान म्हापशें नगरपालिका तशेंच उत्तर गोंय कोमुनिदाद प्रशासकां कडेन कागाळ दाखल केल्ली. हें बेकायदो बांदकाम ऑटोमोटिवीस दी क्रिस्टल एलएलपी ही कंपनी करीत आसून हे खातीर म्हापशें पालिका आनी संबंदीत सरकारी प्राधिकरणांची परवानगी घेतिल्ली ना, असो दावो सदर कागाळींत केल्लो.
ते प्रमाण पालिका मुख्याधिकारी चंद्रकांत शेटकार हांणी कारणां दाखय नोटीस दिवन सदर बांदकाम बंद दवरपाचो आदेश क्राफटेक बिल्डर्स ह्या कंत्राटदार कंपनीक जारी केला.
गोंय नगरपालिका कायद्या खाला ह्या बांदकामा खातीर वयले पालिकेची परवानगी घेतली ना. ताका लागून ह्या नेमांचें उल्लंघन थारता. ते प्रमाण हें बांदकाम ताकतिकेन बंद करून येता त्या पंदरा दिसांत आपलें म्हणणें सादर करचें अशेंय ह्या आदेशपत्रांत नमूद केलां.
तशेंच मुख्याधिकाऱ्यांनी ह्या नोटिसीची प्रत म्हापशें पुलीस निरिक्षक तशेंच पालिका निरिक्षकाक धाडून ह्या थळा वेलें बांदकाम सुरू उरचें ना हाचेर देखरेख दवरपाची सुचोवणी केल्या.
मजगतीं, येता त्या 7 जून दिसा, दनपारां 3 वरांचेर सदर शेडीचे सुवातेर जोड पळोवणेची वेळ निश्चीत केल्या आनी संबंदीत कंत्राटदारान आपल्या दस्ताएवजा सयत हजर रावपाचे निर्देश दिल्यात. नाजाल्यार कायदेशीर कारवाय करतले अशें ह्या नोटिसींत मुख्याधिकाऱ्यांनी स्पश्ट नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
