भांगरभूंय | प्रतिनिधी
पणजीः पणजे मळ्यांतल्या तळ्यांतलें नुस्तें मरपाच्या प्रकरणांत उच्च न्यायालायची बडी पडले उपरांत पणजी म्हानगरपालिका आतां ऍक्शन मोडार आयल्या. म्हानगरपालिका संबंदीत अधिकार्या वांगडा शेनवारा तळ्यांतल्या वाठाराची पळोवणी करून दरेक घरांतल्या सिवेजीची जोडणी आनी सॅप्टीकाचे टाकयेची तपासणी करतले. हे विशींची नोटीस म्हानगर पालिकेन जारी केल्या.
कांय दिसां पयलीं मळा नेवगीनगर वाठारांतल्या खारें उदकांतल्या तळ्यांतलें शेकड्यांनी नुस्तें अचकीत मेलें. सिवेजीचें उदक तळ्यांत वचून उदक साचिल्ल्यान उदकांत ऑक्सिजनाचो उणाव जावन नुस्तें मेल्ल्याचो मुळावो अदमास उक्तायला. ह्या प्रकरणाची स्वेच्छा दखल गोंय स्थित मुंबय उच्च न्यायालयान घेवन ह्या तळ्यांत सिवेजी उदक झिरपता काय ना हाची पळोवणी करून अहवाल सादर करपाचो आदेश म्हानगरपालिकेक दिल्लो.
ह्या आदेशाक पाळो दित म्हानगरपालिकेन नोटीस जारी करून मळ्यांतल्या तळ्याच्या भोंवतणच्या २०० मिटर परिसरांत रावपी लोकांक नोटीसी जारी करून कळीत केलां, मळा तळ्यांत मेल्लीं नुस्तीं उफेतना मेळिल्ल्या प्रकरणांत गोंयच्या मुंबय उच्च न्यायालयान जनहित याचिका दिल्ल्या आदेशा प्रमाण संबंदीत अधिकारी वाठारांची पळोवणी करतले.
हातूंत महापालिकेचे अधिकारी, भुमी अभिलेख संचालनालय, भलायकी खातें आनी भौशीक बांदकाम खातें (मलनिस्सारण विभाग) हांच्या अधिकार्यां वांगडा मेळून मळें तळ्याच्या उण्यात उण्या २०० मिटर वाठारांत आशिल्ल्या निवासी घरांची तशेंच वेवसायीक संस्था, हावसिंग सोसायट्यो आदींची तपासणी करतले.
प्रदूशणाचो उगम सोदून काडपा खातीर आनी खंयचेंय प्रक्रिया न करता सोडिल्ले सिवेजीचें उदक मळे तळ्यांत सोडटात काय ना, हें निश्चीत करपा खातीर ही तपासणी करतले.
रहिवाशांनी आपल्या घरांच्या, वेवसायीक संस्थांच्या वा सोसायट्यांच्या सिवरेज जोडणीची, सेप्टिक टँक वा सोक पिट जोडणीची वळख पटोवन दिवपा खातीर आनी ती तपासपा खातीर अधिकार्यांक पुराय सहकार्य करचें, अशी विनवणी पालिकेन केल्या.
#Panjim #Mala #Fish #DeadFishIssue
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
