भांगरभूंय | प्रतिनिधी
7 जाण जखमी; 6 जाणांक घेतले ताब्यांत
दिवचल: मयें गांवांतल्या मायां केळबाय पंचायतनच्या देवस्थानांत महाजनां मदीं सुरू आशिल्ल्या वादान काल (बुधवारा) वातावरण तापलें. दनपारां देवळांत भावीक आनी हेर लोकांची दर्शना खातीर गर्दी आसतनाच मयेंतल्या नायक समाजांतल्या वांगड्यांनी देवळाच्या प्राकारांत परब कुटुंबांतल्या लोकांक मारपेट केली. हे मारपेटींत सात जाण जखमी जाले. तातूंत एका पांच वर्सां पिरायेच्या भुरग्याचो आस्पाव आसा. ह्या प्रकरणांत परब कुटुंबान पुलिशेंत कागाळ केल्या. पुलिसांनी गुन्यांव दाखल करून नायक कुटुंबांतल्या स जाणांक ताब्यांत घेवन तपास सुरू आशिल्ल्याचें सांगलें.
मयेंतल्या मायां केळबाय पंचायतन देवस्थानाच्या महाजनकीचो तशेंच उत्सवांतलो मान आनी अधिकारांचो वाद वर्सानवर्स चालूच आसा. ह्याच वादाक लागून ह्या वर्सा मयें केळबाय देवीची पेठ देवळांतल्यान भायर सरूंक शकली ना. केळबायवाडो मयां देवी केळबायचें देवूळ, समितीन बंद दवरिल्लें. ह्याच मुद्या वयल्यान वादाक तोंड फुटलें आनी ताचें पर्यावसन मारपेटींत जालें.
मेळिल्ले म्हायती प्रमाण काल समितीन केळबाय वाडो हांगासरले देवूळ बंद केलें. नायक कुटुंबांतल्या एका वांगड्यान दिवचल मामलेदार कचेरेंत एक अर्ज करून देवूळ उक्तें करपाची मागणी केल्ली. ते प्रमाण मामलेदारान समितीक देवूळ उक्ते करपाचो आदेश दिलो.
पूण देवूळ दनपार मेरेन उक्तें करूंक नाशिल्ल्यान नायक समाजांतले 15 ते 20 वांगडी थेट गांवकारवाडो मयें हांगा महामाया देवळा कडेन गेले. थंय सांपडिल्ल्या परब कुटुंबांतल्या वांगड्यां कडेन वाद घालून तांकां मारपेट करपाक सुरवात केली. कुटुंबांतल्या सात जाणांक खर मारपेट केली. तातूंत पांच वर्सां पिरायेचे चलयेकूय मार लागला अशी म्हायती मयूर परब हांणी दिली.
हे मारपेटींत लवू रामा परब, मयूर परब, मुकूंद साजी प्रभुगांवकार, मिष्टी मयूर प्रभुगांवकर (5), राजेश नामदेव परब, सुरेश महादेव परब, महादेव सुरेश परब हांकां मार लागला. ह्या झगड्यांत तुकाराम नारायण परब हांच्या अल्टो मोटारीचें फातर मारून लुकसाण केलें. तशेंच घराचेरूय फातर मारले.
ह्या प्रकरणांत परब कुटुंबां कडल्यान दाखल केल्ले कागाळी वयल्यान पुलिसांनी गुन्यांव नोंद केला, आनी रातीं उसरां स जाणांक ताब्यांत घेतल्यात. तांचेर विवीध कलमां खाला गुन्यांव नोंद केला. तशेंच परब कुटुंबांनी दिल्ले कागाळींत सुमार 17 जाणांचीं नांवां दिल्यांत. तांचो सोद पुलीस घेतात.
उपजिल्होधिकारी, मामलेदार हांकां 5 वरां दवरले बंदिस्त
परब कुटुंबांतल्या वांगड्यांक मारपेट जाल्ल्याचें समजतकूच गांव एकठांय जालो. घडणूक थळार गांवकारवाडो मयां दाखल जाल्ले उपजिल्होधिकारी रोहन कासकार. मामलेदार राजाराम परब हांकां परब कुटुंबांतल्या बायलांनी जमाव करून एका घरांत बंदिस्त दवरले. हल्लो करप्यांक रोखड्या रोखडी अटक करात अशी मागणी तांणी लावन धरिल्ली. सुमार पांच वरां तांकां बंदिस्त दवरले उपरांत उत्तर गोंय पुलीस अधिक्षकान मयां भेट दिवन कायद्या प्रमाण सगल्या दोशींचेर गुन्यांव नोंद करून अटक करपाचें आस्वासन दिले उपरांत तांकां सोडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
