भांगरभूंय | प्रतिनिधी
म्हापशें, प्रतिनिधी ः पुलीस आशिल्ल्याचें सांगून मयड्या देड लाखांचें मंगळसुत्र फारावपाची घडणूक 4 मे दिसा घडली. पूण कागाळदार बायलेन 15 मेक पुलिशेंत कागाळ केल्ल्यान ती घडणूक काल उक्ताडार आयल्या.
4 मे दिसा दनपारां 12.20 वरांचेर कागाळदार विनंती परब (63) आपल्या घरा लागसारच्या दुकानांत भाजी घेवपाक वताली. ह्या वेळार स्कुटरी वयल्यान दोग जाणा आयले. आमी खास ड्युटीचेर आशिल्ले पुलीस अधिकारी आसात आनी ह्या जाग्यार चोरयेचो घडणुकी घडटात. चोर वाटेर वचपी लोकांक धरून तांच्यो भांगराच्यो वस्ती लुटतात. देखून भांगर घालून भोंवप धोक्याचें, अशें दुबावितांनी सांगून तिका मंगळसूत्र काडपाक लायलें. उपरांत दुबावितांनी तें कागदांत गुठलायलें आनी तिच्या हातांत दिलें.
कागाळदार बायलेन घरा वचून कागद उगडलो तेन्ना तातूंत फातर आशिल्ले. तिणें हें कुटुंबाक सांगलें. दुबावितांनी तिका उलोवपांत गुंग दवरुन कागदाच्या गुठल्याची अदला बदल केल्ली. दुबावीत हिंदींतल्यान संवाद सादताले. चोरी केल्ल्या मंगळसूत्राचें वजन 24 ग्राम आसून ताचें मोल देड लाख रुपया आसा.
हे घडणुके बायलेन पुलिशेंत कागाळ दाखल करूंक ना. पूण कांय दिसां आदीं आगशी पुलीस स्टेशन वाठारांत अशेच तरेचो एक प्रकार घडिल्लो. हे विशींची खबर आयकून तिच्या कुटुंबान बुधवारा पुलीस स्टेशनांत कागाळ दाखल केली. ते प्रमाण पुलिसांनी बोगस पुलिसां आड गुन्यांव नोंद केला. फुडली चवकशी पुलीस उपनिरिक्षक अजय धुरी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
