मयडें पुला कुशीक पंचायतीन उबारले सीसीटीव्ही कॅमेरे

कोयर उडोवप्यांक धरपा खातीर पंचायतीन उबारिल्ले सीसीटीव्ही कॅमेरे.

भांगरभूंय | प्रतिनिधी

कोयर उडोवप्यांचेर करतले दंडात्मक कारवाय

म्हापशें: मयडें पुला कुशीक बस्तोडें पंचायत वाठारांत उडयतात तो कोयर उबारून थंय मयडें पंचायतीन सीसीटीव्ही कॅमेरे उबारल्यात.

हो कोयराचो प्रस्न गांवा खातीर हुस्क्याचो विशय थारिल्लो. मयडें गांवच्या प्रवेशदारारूच कोयराच्यो राशी पडत आशिल्ल्यान गांवचें विद्रुपीकरण जातालें. प्रजासत्ताक दिसाचे औचित्य सादून मयडें पंचायत मंडळान कोयर उबारून तशेंच सीसीटीव्ही कॅमेरे उबारपा सयत कोयर एकठांय करपाचो उपक्रम राबयलो. ह्या उपक्रमांत पंचायत मंडळाक थळाव्यांचेंय सहकार्य मेळ्ळें.

थळाव्यांनी हांगा खूबशे फावटी मोहीम राबोवन कोयर एकठांय केल्लो. पूण कोयर उडोवपाचे प्रकार थांबूंक नाशिल्ले. हो वाठार बस्तोडें पंचायत वाठारातं येत आशिल्ल्यान पंचायत मंडळाक उल्लंघनकर्त्यांचेर योग्य अशी कारवाय करूंक मेळनाशिल्ली.

ते खातीर मयडें पंचायतीन हे समस्येचेर निराकरण करपा खातीर बस्तोडें पंचायतीक कोयर उडोवप्यांचेर कारवाय करपा खातीर सीसीटीव्ही कॅमेरे उबारपाची विनंती, पत्रा वरवीं केल्ली. पूण हे पंचायती कडल्यान कसलोच प्रतिसाद मेळूंक नाशिल्ल्यान मयडें पंचायतीन स्वता जावन शेजारच्या पंचायत वाठारांत कॅमेरे उबारले.

सरपंच सागर नायक हांणी सांगलें, पुला कुशीक लोक कोयर हाडून उडयत आशिल्ल्यान गांवच्या प्रवेशदारार घाण पातळिल्ली. हो भाग बस्तोडें पंचायती खाला येता. पूण आमच्या गांवा कडेन वचपी ह्या रस्त्याचें विद्रुपीकरण जायत आशिल्लें. बस्तोडें पंचायतीन हे सुवातेर सीसीटीव्ही कॅमेरे बसोवंक नाशिल्ल्यान आमी ते उबारले.

आमी गांवांत ओलो आनी सुको कोयर एकठांय करतात. पूण हांगा कांय लोक कोयर हाडून उडयतात. हो वाठार जरी शेजारचे पंचायतीचो आसलो तरी हाका लागून आमचे पंचायतीक दोश दितात. ताका लागून हो उपक्रम राबयलो. कोयर उडोवप्यांचेर दंडात्मक कारवाय करतले अशें उपसरपंच ज्युलिएट डिकुन्हा, पंच लवू ठाकूर, संतोष च्यारी हांणी सांगलें.