भांगरभूंय | प्रतिनिधी
पणजी : रिव्होल्युशनरी गोवन्स पार्टीचे मुखेली, संस्थापक अध्यक्ष मनोज परब हांणी पक्ष सोडले उपरांत सध्या गोंयच्या राजकी मळार बरोच बोवाळ जाला. हे विशीं विवीध मानेस्त प्रतिक्रिया उक्तायतात. तांणी आपणेंच स्थापन केल्लो पक्ष सोडपाक जायनाशिल्लो; अश्योय भावना खुबश्या जाणांनी उक्तायल्यो. तांच्या राजिनाम्या उपरांत आरजीपी पक्षाच्या फुडारा विशीं गंभीर प्रस्न लोकांनी उपस्थीत केल्यात. राजकी निरीक्षक आनी समर्थकांच्या मतान, मनोज परब हांणी विधानसभा वेंचणूक लागीं पाविल्ली आसतना, अश्या निर्णयक टप्प्याचेर पक्ष सोडप आरजीपी खातीर व्हड लुकसाणाचें थारपाक शकता.
मनोज परब हांणी अश्या म्हत्वाच्या वेळार पक्ष सोडपाक जायनाशिल्लो, अशी वयक्तीक भावना गोंयच्या राजकीय मळार कार्यरत आशिल्ले प्रा. रामराव वाघ हांणी उक्तायल्या. ‘गोंयकार’, गोंयचें पर्यावरण आनी संस्कृतीची राखण करपाची गरज आसतना असो निर्णय घेवपाक जायनाशिल्लो. ह्या लढ्यांत आरजीपीची भुमिका म्हत्वाची आशिल्ली. राजकी पक्ष स्थापन करून तो चलोवप सोपें काम न्हय. आरजीपीन हें करून दाखयलें, मात ह्या म्हत्वाच्या वेळार पक्ष सोडून दिवप योग्य न्हय. हाका जापसालदार कोण? पक्षाचें हित सोडून सत्ते खातीर कोण सुवार्थी जाला? अशे प्रस्न प्रा. वाघ हांणी हाजीर केले.
मनोज परब हांचे कडेन आपले मतभेद जरी आसले तरी ताका एकल्याकूच हे स्थितीचो दोश दिवपाक मेळचो ना. राजकी पक्ष हे भावनेवर चलनात, भावनांचो वापर पक्षाच्या फायद्या खातीर करून घेवपाचो आसता. थंड तकलेन राजकी पक्ष चलोवचे पडटात. आरजीपी आनी हेरांनी हें भाजपा कडल्यान शिकपाक जाय, असो सल्लो प्रा. वाघ हांणी दिलो. सद्याचे स्थितींत गरजेची प्रगल्भताय दाखयल्ले विश्वेश नायक आनी अजय खोलकार हांचे टिमीक परबीं!
सांत आंद्रेंच्या राजकारणाचेरूय प्रस्न
सांत आंद्रेंचे आमदार विरेश बोरकार आनी तांच्या सहकार्यांनी कांय प्रस्नांच्यो जापो दिवपाक जाय. हो नेमको विशय कितें आनी फाटले दोन म्हयने सुरू आशिल्ल्या ह्या विशयाचें सांत आंद्रे मतदारसंघाचेर कितें परिणाम जातलो? काम करून दाखोवपाक उणे पडिल्ले, हें ह्या वेगळेपणाचें मुखेल कारण काय? गोंयांत स्विकार्यता मेळोवपा खातीर फकत देखावो निर्माण करपाक आमदारान हें पावल उबारलां काय? मात मूळ समस्ये कडेन आडनदर करप हें आतां तांचें वैशिश्ट्य जालां काय? आतां वावड्यो सुरू आसा त्यो म्हणल्यार, ते आदल्या पक्षांत प्रवेश घेतले काय, आनीक कितें चालू आसा? अशे प्रस्न प्रा. वाघ हांणी हाजीर केले.
आमदाराचे सल्लागार आशिल्ले काय जाण बनावट सोशल मिडिया खात्यावेल्यान पोस्ट, व्हिडीओ, मेमे हांचे वरवीं चुकीची म्हायती पातळटाले, अशें आदले मुखेली मनोज परब म्हणटात.
मात, आमदाराची ही स्थिती सुधारपा खातीर कितेंय यत्न दिसनात. हाका लागून दुबाव आनीक बळिश्ट जाल्ल्याचे प्रा. रामराव वाघ हांणी म्हणलें. वट्ट हे स्थितीचो सांत आंद्रे मतदारसंघाचेरूय परिणाम जावपाची वाघ हांणी शिटकावणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
