भांगरभूंय | प्रतिनिधी
पणजीः मनुष्यबळ उदरगत म्हामंडळाच्या कर्मचाऱ्यांक आतां सव्या पगार आयोगा प्रमाण पगार दितले. हे संबंदीचो आदेश बेगीनूच जारी जातलो अशी म्हायती मुख्यमंत्री डॉ. प्रमोद सावंत हांणी दिली. सध्या मनुष्यबळ उदरगत म्हामंडळाच्या कर्मचाऱ्यांक पदा प्रमाण 14 हजार रुपया, 18 हजार रुपया असो पगार दितात.
मनुष्यबळ उदरगत म्हामंडळा वतीन ऑफिस असिस्टंट, सुरक्षा रक्षक, एमटीएस, ड्रायव्हर, सुपरवायझर ह्या पदां खातीर भरती करता. म्हामंडळान भरती केले उपरांत गरजेच्या खात्याक धाडटात. सध्या म्हामंडळान एक हजारा परस चड कर्मचाऱ्यांची भरती केल्या. आनीक भरती जावपाची आसा. कायम स्वरुपी सरकारी कर्मचाऱ्यांक सव्या पगार आयोगा प्रमाण पगार दितात. पूण म्हामंडळा खाला भरती केल्ल्या कर्मचाऱ्यांक उणोच पगार दितात. ह्या कारणाक लागून कांय जाण वेंचून आयले उपरांत लेगीत नेमणूक पत्र मान्य करिनात. ह्या कर्मचाऱ्यां खातीर सवो पगार आयोग लागू करचे ना पूण तांकां सव्या पगार आयोगा इतलो पगार दितले. हाका लागून ऑफिस असिस्टंट, सुरक्षा रक्षक, एमटीएस, ड्रायव्हर ह्या पदां खातीर योग्य आनी पात्र उमेदवार अर्ज करतले. सरकारी खात्यांत नेमणूक करतना मनुष्यबळ विकास म्हामंडळा खाला काम केल्ल्याचो अणभवूय विचारांत घेतात. ज्या खात्यांत कर्मचाऱ्यांचो उणाव आसा थंय मनुष्यबळ विकास महामंडळा वरवीं भरती केल्ल्या कर्मचाऱ्यांची वेवस्था करतात.
खाजगी क्षेत्रांतल्या कर्मचाऱ्यांक सुविधा, सवलती दितले
मजगतीं, खाजगी कंपनींनी काम करपी कर्मचाऱ्यांक सवलती आनी अर्थीक लाव सरकार दितलें. कांय खाजगी कंपनींतल्या कर्मचाऱ्यांक सरकारी कर्मचाऱ्यांच्या तुळेंत उणो पगार मेळटा. तरी लेगीत जायते लोक अणभव मेळोवपा खातीर आनी बऱ्यो संदी मेळोवपा खातीर खाजगी क्षेत्रांतल्या नोकऱ्यांनी उण्या पगारान काम करतात. अशा कर्मचाऱ्यांक आतां सरकारा कडल्यान सुविधा आनी सवलती दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
