भांगरभूंय | प्रतिनिधी
आप फुडारी रामराव वाघ हांची म्हायती
पणजी ः मनीसबळ उदरगत म्हामंडळा कडल्यान 944 रिक्त पदां खातीर भरती प्रक्रिया सुरू आसा. हाचे खातीर एक अर्ज 50 रुपया मेळ्ळें. हे खातीर सुमार 30 हजार अर्ज विकले आनी सरकाराक 15 लाख रुपया मेळयल्यात. हे प्रक्रियेंत अनियमितताय आशिल्ल्यान ती रद्द करपाची आमची मागणी ठाम आसा अशें आप फुडारी रामराव वाघ हांणी सांगलें. शेनवारा पणजेत जाल्ले पत्रकार परिशदेंत ते उलयताले. ह्या वेळार रोहन नायक हाजीर आशिल्ले.
वाघ हांणी सांगलें, म्हामंडळान केल्ली भरती प्रक्रिया ऑनलायन नाशिल्ली. अर्जांची विक्रीय रोख पयशांनी जाली. अर्जांची विक्री सुरू जाले उपरांत उमेदवारांक वताक उबे रावचें पडलें. अर्ज विक्री आतां सोंपल्या. हाचे फुडें म्हामंडळ 30 हजार उमेदवारांची मुलाखत घेतले कांय? तशें आसल्यार ताचे खातीर खंयची पद्दत नियोजीत केल्या? फाटल्या वेळा प्रमाण मुलाखत एका मिण्टांत सोंपयतलें कांय हाची जाप सरकारान दिवची.
944 पदां भरती करतना एससी, एसटी वा ओबीसी समाजा खातीर कसलेंच आरक्षण दवरिल्लें ना अशें तांणी सांगलें. हे विशीं आमी एससी एसटी आयोगा कडेन कागाळ केल्ली. पूण आमचे कागाळीक जाप दिवप आयोगाक लेगीत योग्य दिसलें ना. सध्या भाजपा वांगडी नोंदणी मोहीम चलयता. वांगडी नोंदणी केल्यार नोकरी दितले अशें ते सांगतात अशें आमकां कळ्ळां. सरकाराक जर अशींच पदां भरपाचीं आसल्यार कर्मचारी निवड आयोग स्थापन करपाचो हेतू सोंपता अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
