भांगरभूंय | प्रतिनिधी
खबरां संस्था
नवी दिल्लीः दिल्लीचे उपमुख्यमंत्री मनीष सिसोदिया आनी भलायकी मंत्री सत्येंद्र जैन हांणी मंत्रीपदाचो राजिनामो दिला. मुख्यमंत्री अरविंद केजरीवाल हांणी दोगांयचो राजिनामो स्विकारला. मनीष सिसोदिया हांचे कडेन जायत्या विभागांचीं जापसालदारकी आशिल्ली. सत्येंद्र जैन बंदखणींत गेले उपरांत मनीष सिसोदिया तांच्या विभागाचें काम पळयताले. तांचे कडेन 33तल्यान 18 विभागांची जापसालदारकी आशिल्ली.
सत्येंद्र जैन फाटल्या णव म्हयन्यां पसून बंदखणींत आसात. अातां दिल्ली ‘मद्य’ धोरणा कडेन संबंदींत प्रकरणांत मनीष सिसोदिया हांकां अटक जाले पसून विरोधी पक्षांनी केजरीवाल सरकाराचेर टिका केल्या. तशेंच बंदखणींत आसतनाय सत्येंद्र जैन हे भलायकी मंत्री पदार आशिल्ले.
भाजपाची मुख्यमंत्री केजरीवाल हांच्या राजिनाम्याची मागणी
मनीष सिसोदिया आनी सत्येंद्र जैन ह्या दोगांयनी राजिनामे दिले उपरांत भाजप खासदार मनोज तिवारी हांणी मुख्यमंत्री अरविंद केजरीवाल हांच्या राजिनाम्याची मागणी केल्या. सुप्रीम कोर्टान शिटकायले उपरांत आम आदमी पक्षाची न्हींद खळ्ळ्यां. निमाणे सिसोदिया आनी जैन हांकां राजिनामे दिवचे पडले. आतां मुख्यमंत्री केजरीवाल हांणी नैतिकतेच्या आदाराचेर राजिनामो दिवपाक जाय, अशें ट्विट मनोज तिवारी हांणी केलां.
आतां मेरेन दिल्ली सरकारांतल्या तीन मंत्र्यांचे राजिनामे
राजेंद्र पाल गौतम, मनीष सिसोदिया आनी सत्येंद्र जैन हांचे सयत दिल्लींतल्या तीन मंत्र्यांनी आतां मेरेन राजिनामे दिल्यात. पोरूं राजेंद्र पाल गौतम हांणी एका वादग्रस्त विधाना उपरांत मुख्यमंत्री केजरीवाल हांचे कडेन राजिनामो दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
