मनशाक अपेस किद्याक येता ?

भांगरभूंय | प्रतिनिधी

दुसऱ्यांक उणाक समजप आनी तशें वागोवप वायट. मत्सर हें अपेसाचें एक व्हड कारण. कांय लोकांक दुसऱ्याचें येस हें आपलें अपेस दिसता.

येस सगल्यांकूच मेळना. एक म्हत्वाचो प्रस्न “मनीस अपेशी किद्याक जाता?” कांय जाणांक थोड्या काळा खातीरूच अपेस येता जाल्यार थोड्यांक कायम अपेसूच मेळटा. केन्ना केन्ना एखाद्या कडेन बुदवंतकाय , कला वा कुशळटाय आसता. कांय जाणां कडेन समृद्ध दायज आसता. येस पयस रावता किद्याक?
हाका जायतीं कारणां आसात. कांय जाण म्हणटात नशिबांत नाशिल्लें. दैवाचो भाग आसता. आसत. पूण नाशिबान लेगीत कांय गजाली मनशाचेर सोंपयल्ल्यो आसता. सगलेच दोश नशिबाक दिवप ना.
अपेसाक कांय तंत्रीक गजाली जापसालदार आसता. पयलीं wrong choice of carreer. चुकीच्या कारकिर्दीची निवड करप. कोणाच्या तरी, चड करून आवयच्या दबावा खाला येवन वा हेर कसल्याय कारणा खातीर. चुकीच्या मळार येस केन्नाच मेळना.
दुसरें, मनशाचो attitude म्हणल्यार मनोवृत्ती. अप्रामाणीकपणा, अहंकार, बेशिस्तपणा, हें सगळें मारक थारता. तशेंच ध्येया विशीं अस्पश्टताय सातत्याचो उणाव, कामां फुडें धुकलप, बेफिकिरी, परिस्थिती कडेन जुळोवन घेवप ना, वेळ फुकट वगडावप ह्या सगल्यां खातीर मनशाच्या पदरांत अपेस पडटा.
केन्ना केन्ना मनशाक अतिआत्मविश्वास नडटा. आपूण कोण तरी व्हडलो हो भ्रम बाळगुपी मनशाची अधोगती जाताच.
नशीब आनी तंत्रीक गजाली कुशीक दवरून आनीक एक गजाल आसता. येस हें एक रसायन तें फकत कला वा कुशळटाय आसली म्हूण जायना. दुसऱ्याच्या सुखांत, येसांत आपणें आनंदी जावंक जाय. मत्सर करपाक जायना. दुसऱ्यांक उणाक समजप आनी तशें वागोवप वायट. मत्सर हें अपेसाचें एक व्हड कारण. कांय लोकांक दुसऱ्याचें येस हें आपलें अपेस दिसता. अशें जातकच मनशाचो आत्मविस्वास कमी जायत वता. एक न्हयकारत्मक स्वप्रतिमा तयार जाता. असुरक्षीतताय वाडत वता, अस्वस्थताय वाडत वता. मत्सरा खातीर मनशाची उर्बाच न्हयकारत्मक जाता. जाचो परिणाम तुमच्या कार्यक्षमयतेचेर जाता. आनी सगळ्यांत म्हत्वाचें if you don’t clap for others, your Turn will Never come. हाचो अर्थ जो दुसऱ्यां खातीर टाळयो वाजयना, तांचो वेळ केन्नाच येना.
दुसरो येसस्वी जातना ताचे खातीर जो मनांतल्यान टाळयो वाजयता, ताकाय रोखडेंच येस मेळटा.

संपदा कुंकळकार
9850149319