भांगरभूंय | प्रतिनिधी
कार्नाव्हाल सोंपलो, शिगमो सुरू जावचे आदींच राजसभा वेंचणुके वांगडा लोकसभेच्या मतांखातीर शबय, शबय देस पावंड्यार सुरू जाल्या. आमदार हेवटेन तेवटेन वचपाचें राजकारण गोंयकारांक नवें न्हय.
पयलींचे केंद्रीय कायदोमंत्री रमाकांत खलप हांचे परस राज्याचे शेतकी मंत्री रवी नायक समेस्त आनी समाजामदीं ल्हान जावन वावुरपी. म. गो, काँग्रेस, भाजपा, काँग्रेस आनी परतून भाजपातलें तांचें राजकारण सुना, पुतांकय लावाचें. गोंयांत “पुलाव” (पुरोगामी लोकशाही आघाडी) कसो शिजलो हें लोकांक फुटबॉल खेळत लोकसभा वेंचणुकेंत याद कोण करून दितले ? फुटिल्ल्या आमदारांक घरा आलाशिरो दिवपाक पत्रकार, सरकारी अधिकारी तेन्ना अनमनले ना. तीच काणी पुस्तकांतल्यान केन्नाय वाचपाक मेळटली अशी आस्त बाळगूया.
मतां मागपाक मुख्यमंत्री, आमदार, कार्यकर्ते भोंवतना पत्रकारांकय तांचे वांगडा गांवांगांवांनी भोंवचें पडटा. बोल्सांत हात घालतना, रेवड्यो घेवन वतना तुमी, आमी तांचे कडेन ना पळेल्यार बरें. वेंचणुके दिसा कार्यकर्त्यांच्या खांद्यार हात घालपी रवीबाब लोकसभा वेंचणूक कशे जिखले तें विखुरील्ल्या पानांनी सांगिल्लें तशी सर्त अंदूं दक्षीण गोंयांत जायत? वेंचणुकेच्यो सभा मध्यानरातीं घेवपी आदले मुख्यमंत्री डॉ. विल्फ्रेड डिसोझा हे उत्तर गोंयच्यान लोकसभा वेंचणूक जिखले ना. तांकां राजकारणातले गुरु मानपी राजकारणी अंदूं वग्गी कित्याक? 2027 विधानसभा वेंचणुकेंत जैत मेळोवपा पासत वालांका आलेमांवाक लोकसभा वेंचणुकेंतय घरा घरांनी भोंवपाक जाय. प्रदेस काँग्रेसीचे एकनिश्ठ सरचिटणीस, आदले आमदार जितेंद्र देशप्रभु राष्ट्रवादी काँग्रेस पक्षाचें घड्याळ रातयां आपल्या हाताक घालून खूब भोंवले. लोकसभा वेंचणुकेंत श्रीपादभाऊं आड ते जिखले ना पूण मतां सगल्यांत चड मेळयलींच.
अंदूंचे लोकसभा वेंचणुकेचें राजकारण होळी, शिगम्यांत रंगयाळें जातना तें उत्सव न्हय झूज अशें म्हणपी आसात. रक्तखेव जाल्लो नासलो तरी झुजय म्हारग पडटा, केन्ना कांदो तर केन्ना कापसाची म्हारगाय पेट्टा. झुजांतय अर्थसंकल्प मांडटात, फुडाराचें राजकारण दुडवां खात्यांतल्यान गृहमंत्री पदा खातीर आसतलें. दुडवांचीं गणितां मांडटनाय राजकी, उद्येगी रंग दिसतात पूण ते तात्पुरते.
मतां मागपाक लोकप्रतिनिधी, कार्यकर्ते तुमच्या दारांत येतले तेन्ना तुमी आमकां कितें दिलां तें विचारचें. मोपा विमानतळ गोंयकारांक दिवपाक श्रीपादभाऊंचो व्हड वांटो सपन भाईचें. मुरगांवांक कोळसो प्रदुशणांतल्यान भायर काडून मुरगांवय तेच वाटावंक शकतात. दाबोळी विमानतळ तर उरतलोच दुबाव ना, वैश्वीक झुजावेळार तो देशाक जाय. दाबोळी जसो दक्षिणेचो तसो उत्तरेचोय, मोपाय सगल्यांचो. देशा बरोबर विदेशाचो जातना मोपाची उत्कृश्टताय सांबाळपाचें उतर पेडणें, मांद्रेच्या मतदारांनी घेवचें. नवो विमानतळ खंय हाडूया? बांबोळे, किटला, तळावले, लोलयां?
लोकसभा वेंचणूक लागीं येवंक लागिल्ल्यान देस पावंड्यार भारत माता की जय वातावरण जाता, इंडिया शायनिंगेतल्यान भायर सरुन. गोंयांक सायबा भोगोस तियात्रां सुरु जाल्यांत कला अकादमींत, तियात्रमोगींची उपाट गर्दी. जात्रांनी आंकड्याच्या खेळाक जावंक ना तितलो मोग कला अकादमींत अंदूं खेळ तियात्राचे उगते माचयेक मेळ्ळो. शबयचें बावलें गांवागांवानी व्हेल्यार? गांवचो शिगमो गोंयच्या गांवांनीच सोबता, आंगणांनी मेळ नाचतना लोकप्रतिनिधीय येतले. तांकां येवकार दियात, प्रश्न विचारुया, तांचेकडल्यान तुमकां आमकांय राजकारण शिकपाक मेळटलें.
लोकसभेच्या उपरांत स म्हयने, वर्सा भितर ज्या राज्यांनी विधानसभा वेंचणूक जावपाची आसा ती लोकसभे बराबरीन जावपाचीं चिन्नां दिसतात. रातच्यो सभा जावच्यो ना पूण मोपा विमानतळार मध्यराती गोंयांच न्हय कर्नाटक, महाराष्ट्रांत वचपाक स्टार प्रचारक देंवल्यार? फिल्म स्टार आपलीं विमानांय घेवन येतात, तांकां दाबोळे सुवात मेळना जाल्यार मोपा कित्याक वचचें न्हय?
अंदूं वेंचणूक प्रचारांतय ए आय चे प्रयोग जातले. तयारी चालू आसा भारतीय मनशाक गगनयान मोहिमेर धाडपा खातीर. इस्रो गोंयांत हाडपा खातीर पळोवणी जाल्या व्हय? लोकसभा वेंचणुकेच्या प्रदेश भाजपाच्या जाहीरनाम्यांत तें सपन आसतलेंच. गोंयांत पठारां खंयचीं उरल्यांत ? बेतलांतलें किटला, लोलयेंचें भगवती.
फर्मागुडयेर दोंगुल्ल्यो उरल्यात जाल्यार नवें विद्यापीठ जावचेंच, विज्ञान, तंत्रिक शिक्षणातय मोख उत्कृष्टतायेची आसतली हें उतर जाहीरनाम्यात जाय. २०२७ विधानसभा वेंचणुकेंत अस्तुरेआड उतराचें झुज खेळपाकय अस्तुरे तूं तयार राव हें सांगचें पडटलें. जाहीरनामे मोबायला वेल्यान कागदाचो उपेग करीनासतना पावोवपी गोंय नंबर वन आसत? कॉर्ने निमण्या दोन दिसांनी, प्रचाराचे दीसय उणे जातात, पैशाचीं गणितां व्हड, उमेदवारी अर्जाखातीरसुद्धां. मतां मेजपाच्यो सुवातीय बदलत गेल्यात, एकादरे प्रदेस काँग्रेस कार्यालय नव्या ताल्ल बिल्डिंगेंत दिसतलें. तरणाट्यांक संद मेळत जाल्यार ते जिखतलेच, दीस रात चलल्यार, भोंवल्यार.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
