भांगरभूंय | प्रतिनिधी
पणजीः मुख्य वेंचणूक अधिकारी रमेश वर्मा (आयएएस) हांणी वेंचणूक निरिक्षक डॉ. वृंदा एम. देसाय (आयआरएस) हांचे हाजिरेंत ‘जबाबदारेन मतदान कर’ हें जागृत गोंयकार पंगडान रचिल्लें मतदार जागृती गिताचें लोकार्पण केलें.
पात्र मतदारांची चडांत चड नोंदणी करप आनी वळेरी अशुद्धता पयस करप हाचेर लक्ष केंद्रीत करून मतदार वळेऱ्यांची निश्ठा सुदरावचे खातीर वेंचणूक आयोग नेमान यत्न करतास अशें वर्मा हांणी सांगलें.
‘जबाबदारेन मतदान कर’ हें गीत सगळ्याच मतदारांक ओंपलां आनी लोकांनी व्हड संख्येन येवन 100 टक्के मतदानाचो विक्रम करचे खातीर मतदान करचें, जें फक्त गोंयांतूच शक्य आसा. 7 मे ह्या दिसा व्हड संख्येन मतदारांनी भायर सरून आपलें मत, सोयऱ्यांचें मतदान आनी आपल्या घरच्यांनी मतदान केलां हाची खात्री करची, अशी वर्मा हांणी सुचोवणी केली.
ह्या वेळार प्रायम मिडिया गोवाचे संपादक संदीप केरकार ‘जागृत गोंयकार’च्या पंगडा वांगडा हाजीर आशिल्ले. मतदान जागृती संगीत व्हिडीयो गिताक ‘जबाबदारेन मतदान कर’ ज्यो डिकॉस्टा हांणी संगीत दिलां. जॉन आगियार हांणी रचिल्लें गीत, जो डिकॉस्टा हांणी गायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
