भांगरभूंय | प्रतिनिधी
डॉ. चंद्रकांत शेट्येः आदर्श गांवा खातीर पंचायतींक पुराय आदार करपाचें उतर
भांगरभूंय । प्रतिनिधी
दिवचलः दिवचल मतदारसंघांत आमदार म्हूण वेंचून आयल्यार पांच म्हयने जाल्यात. तली लेगीत पंचायत वेंचणुकेंत लेगीत लोकांनी आमकां व्हड येस मेळोवन दिलां. समाजकारण हो आमचो अजेंडा ना. राजकारण आनी राजकी मतभेद पुरायेन कुशीक दवरून सगळ्यांक वांगडा घेवन दरेका पंचायत विभाग आनी मतदारसंघ आदर्श सर्वांगी उदरगत करप होच आमचो संकल्प आसा, अशें दिवचलचे आमदार डॉ. चंद्रकांत शेट्ये हांणी पत्रकार परिशदेंत सांगलें.
डॉ. शेट्ये हांणी 12 ऑगस्टाक राती कडेन आपल्या मुळगांव, साळ, मेणकुरें, धुमाशें, लाटंबार्शे ह्या चार पंचायतींनी जैतवंत जाल्ल्या उमेदवारां वांगडा पत्रकार परिशद घेवन उदरगतीच्यो येवजण्यो जाहीर केल्या. ह्या वेळार प्रदीप रेवोडकार, त्रिशा राणे, रामा गांवकार, क्रश्ना आरोलकार, निलम कारापूरकार, उमेश शेट्ये, संजना नायक, विश्वंभर नायक, कुमिदिनी नायक, गुरुदास परब, वैष्णवी परब, सावित्री घाडी, आपा रावत, दिव्या नायक, मनू शिंदे, गजानन मांद्रेंकार, सुहासिनी गोवेकार, विशालसेन गाड, तृप्ती गाड, मानसी कवठणकार, बबनराव राणे, निलेश गांवकार हाजीर आशिल्ले.
आमी आमचे उमेदवार उबे केल्ले. तातूंतले दोग जाण बिनविरोध वेंचून आयले. मेणकुऱ्या पांच, साळांत पांच, लाटंबार्शे पांच आनी मुळगांवां पांच उमेदवार वेंचून आयले. तांच्या जैता खातीर डॉ. शेट्ये हांणी लोकांचे उपकार मानले.
आमी प्रामाणीकपणान काम करतात. संघटीत रावून उदरगतीक चालना दिवचे खातीर सगळ्यांचो तेंको मेळचो, अशी आस्त आसा. पंचायत मंडळांनी गांवाचे उदरगतीचें योग्य नियोजन करचें. तातूंत सेवा, शिक्षण, भलायकी, बाल कल्याण आनी लोकाभिमुख प्रकल्प हातांत घेवचें. तशेंच मनशाची जीण सुखी करपी उपक्रम हातांत घेवन दरेक गांव आदर्श कसो जातलो हाचें नियोजन करचें. हे खातीर सगळ्या पंचायत वांगड्यांक बऱ्या दर्जाचें मार्गदर्शन करचे खातीर विशेश शिबिराची आंखणी करतले, अशें डॉ. शेट्ये हांणी सांगलें.
बबनराव राणे, निलम कारापूरकार, गुरुदास परब, मानसी कवठणकार, विलाससेन गाड, प्रदीप रेवोडकार हांणी उदरगतीक चालना दिवचे खातीर पंचायत मंडळांनी संघटीत योगदान दिवपाचो उलो मारलो. तशेंच ह्या वेळार दिलीप धारगळकार हांणीय मार्गदर्शन केलें.
मुख्यमंत्र्यांचें समर्थनः डॉ. शेट्ये
खूबशे नवे पंच आशिल्ल्यान तांकां प्रशासन, सुशासन, लोकांचे प्रस्न हाची म्हायती करून दितले. आमी सरकाराक तेंको दिला. मुख्यमंत्री डॉ. प्रमोद सावंत हांचें पुराय समर्थन आमकां आसा. ताका लागून उदरगत प्रक्रिया निश्चितूच गतीमान जातली, अशेंय डॉ. शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
