भांगरभूंय | प्रतिनिधी
रोपांच्या जतनायेची जापसालदारी शिक्षकांची
पणजी, प्रतिनिधी : लोकसभा वेंचणुकेंच्या मतदाना वेळार मतदान केंद्राचेर फळ तशेंच हेर झाडांची रोपां लावपाचो उपक्रम वेंचणुक आयोगान राबयल्लो.
हे उपक्रमा खाला वेंचणूक आयोगाच्या कर्मचाऱ्यांनी मतदाना वेळार झाडांची रोपां लायली. दरेकी मतदान केंद्राचेर 5 रोपां लावपाचे उद्दीश्ट वेंचणूक आयोगान दिल्ले. हे प्रमाण दरेकी मतदान केंद्राचेर 5 रोपां लायली. हरीत मतदान केंद्र करपाच्या उपक्रमा खाला ही रोपां लायली. उत्तर आनी दक्षीण गोंय मेळोन 1825 मतदान केंद्रा आसा. शाळा तशेंच विद्यालयांनी चडशी मतदान केंद्रां आसा.
ह्या रोपांक उदक घालून तांची जतनाय घेवपाची जापसालदारी संबंधीत शिक्षकांची आसा. लायिल्ल्या रोपांचे नेमान ऑडिट जातले, अशें परीपत्रक शिक्षण संचालक शैलेश झिंगडे हांणी जारी केला. हाका लागून वर्सा उपरांत कितली रोपां वाटावली वा मेली हाची म्हायती शिक्षण खात्याक मेळटली. मतदाना वेळार वेंचणूक ड्यूटी वेल्या कर्मचाऱ्यां सयत काय मतदारांनी रोपां लायलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.