भांगरभूंय | प्रतिनिधी
दोडामार्ग, प्रतिनिधी : पांच दिसांच्या गणपती बाप्पाचें विसर्जन करतना मणेरी कुबलवाडीच्या मणेरी रेसिडेन्सीचे गेटीक सोहम संजय कुबल आनी संजय कुबल ह्या पूल आनी बापायक विजेचो शॉक लागिल्ल्यान ते जखमी जाले. हे वस्तींत कसलेच तरेचो शिटकावणी तखटो लायनासतना लोकांचे जिणे कडेन खेळपी रेसिडेन्सी धनयाचेर दोडामार्ग पुलिशेंत गुन्यांव दाखल केलो. हे रेसिडेन्सीचो धनी गोंयकार.
चड म्हायती प्रमाण, बुधवारा चवथीच्या पांचव्या दिसा बाप्पाचें विसर्जन करतना सांजेवेळार मणेरी कुबल वाडीचे ग्रामस्थ आपल्या गणपती विसर्जन मिरवणुकेंत गुंग आशिल्ले. मणेरी रेसिडेन्सी हे इमारती कडेन मिरवणूक पावली. सोहम कुबल गणपतीची मिरवणूक ते रेसिडेन्सीचे राखणे वणटी कडेन रावून पळयतालो. अचकीत ताचो हात राखणे वणटीक लागलो आनी ताका लायटीचो शॉक लागलो. तो व्हडल्यान आपलो जीव वाटावपा खातीर आड्डलो. हें पळोवन ताचो बापूय संजय ताका वाटावपा खातीर धांवत गेलो आनी ताकाय विजेचो शॉक लागलो. उपरांत ते दोगूय जमनीर कोसळ्ळे. तांकां रोखडेच दोडामार्ग ग्रामीण हॉस्पिटलांत उपचारा खातीर दाखल केले.
उपरांत हो विशय ग्रामस्थांनी दोडामार्ग पुलिसांक कळयलो. पुलीस घडणुके सुवातेर दाखल जाले. रेसिडेन्सी धनयाक गांवांतल्या ग्रामपंचायत वागड्यांनी फोन लायलो तेन्ना तांणी वयले वयर जापो दिल्यो. ह्या वेळार तिडकल्ल्या ग्रामस्थांनी दोडामार्ग पुलिशेंत कागाळ दिली. मणेरी रेसिडेन्सीच्या गोंयच्या धनयाचेर पुलिसांनी गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
